Shu kunlarda shaxmat boʻyicha “Meltwater Champions Chess Tour” onlayn musobaqasi oʻtkazilmoqda.

Mukofot jamgʻarmasi 150 000 AQSh dollarini tashkil etuvchi ushbu nufuzli turnirda jahonning reytingi baland grossmeysterlari gʻoliblik yoʻlida dona suryapti. Yulduz shaxmatchilar qatorida hamyurtimiz Nodirbek Abdusattorov ham bahslarda ishtirok etyapti.

Tezkor shaxmat boʻyicha jahonning eng yosh va shu bilan birga amaldagi chempioni hisoblangan Nodirbek kecha oʻtkazilgan 4 ta partiyaning 3 tasida kuchli raqiblari bilan murosa yoʻlini tanladi va 9-turda turnirdagi ikkinchi magʻlubiyatini Shvetsiyalik Nils Grandeliusdan qabul qilib oldi.

Eʼtiborlisi, Abdusattorov 11-turda amaldagi jahon toji sohibi, norvegiyalik Magnus Karlsen bilan roʻbaroʻ keldi va Jahon chempionlari 84-yurishdan soʻng durangga rozi boʻlishdi.

Shu tariqa, bu safar ham Karlsen Nodirbekni magʻlub eta olmadi. Shaxmatchilarning bundan avvalgi uchrashuvi jahon chempionati doirasida oʻtkazilgan boʻlib, oʻshanda Abdusattorov tarixiy gʻalabaga erishgan edi.

Kecha shaxmatchimiz 10-turda AQSh vakili Daniel Narodiskiy, 12-turda polshalik Yan-Kshishtof Duda bilan durangga imzo chekdi.

Nodirbek 5 gʻalaba, 5 durang va 2 magʻlubiyat bilan 20 ochko jamgʻargan holda turnir jadvalida 6-oʻrinni egallab turibdi.

Turnir jadvalida Duda 25 ochko bilan yakka peshqadam boʻlib oldi. Ozarbayjonlik Shaxriyar Mamadyarov 23 ochko bilan ikkinchi oʻrinni egallagan. Gukesh, Erigaysi va Magnus Karlsen hisobida 21 tadan ochko bor.

• Magnus Karlsen
• Nodirbek Abdusattorov
• Shaxmat