Qaysi biri sayohatbop: Netbuk yoki planshet? 

  • 04:38 / 17.05.2020
  • 57

Ayni kunda zamonga moslashib borayotgan sohalarni internet va kompyutersiz tasavvur qilish qiyin. Sababi oddiy: ish unumdorligining yuqoriligi, vaqt tejamkorligi hamda ortiqcha xarajat talab etmasligi.

Yana bir qulay tomoni shundaki, xizmat safarida bo‘luvchilar uchun endi uyum-uyum xat-hujjat ko‘tarib yurish shart emas. Yuklatilgan vazifani birgina planshet yoki netbuk yordamida amalga oshirish imkoniyati ham mavjud. Bir-biridan qolishmaydigan bu ikki qurilmaning ham qaysi biri ko‘proq qulayliklarga ega ekanligini soha vakillari o‘rganib chiqishdi. Agar xizmat safari chog‘ida ko‘p vaqtingiz internetdan foydalanish bilan o‘tgudek bo‘lsa, netbuk hamda smartfonlar bellashuvni tark etishga majbur. 

Kichik o‘lchamda bo‘lishiga qaramay,  keng doiradagi amallarni bajarish qobiliyatiga ega bo‘lgan yana bir yordamchi – planshet va netbukdir. Xo‘sh, sizga qaysi biri ma’qul? Bu savolning nimasi jiddiy deyishingiz mumkin, albatta. Shunchaki musiqa tinglash, filmlar tomosha qilish, internetda sayr qilishni xohlasangiz ulardan aynan birini afzal ko‘rishning keragi yo‘q. Bu borada ikkisi ham birdek vazifani bajaradi. 

Ma’lumki, kompyuter qurilmalarini tanlashda uning og‘irligi,  quvvat olmasdan ishlash qobiliyati va eng muhimi bajarishi kerak bo‘lgan vazifalari hisobga olinadi. Masalan, planshetlar ham shu tomondan o‘rganilsa, vazni yengil, biroq uni ko‘tarib yurish uchun maxsus qopcha kerak. Sababi, eng kichik planshetlar ham cho‘ntakka og‘irlik qilishi, tabiiy. Shuningdek, planshetlar quvvat olmasdan ham uzoq ishlaydi. 

Netbuk imkoniyat darajasidan ortda qolmaydi, vaznini hisobga olmasa, maxsus sumkada ko‘tarib yurishga qulay. Quvvati tugaganidan so‘ng batareya yangisiga o‘zgartirilsa,  ishlash jarayoni ikki baravarga uzayadi. Shuningdek, videoni qayta ishlash, xat yozish, fotosuratlarni ijtimoiy tarmoqqa yuklashingiz kerak bo‘lsa, unda ko‘proq netbuk sizga yordam beradi. Bundan tashqari, unda o‘rnatilgan kuchli dasturiy ta’minot tufayli imkoniyatlar ko‘proq bo‘lishi mumkin. Balki yuqoridagi ishlarni amalga oshirish uchun maxsus dasturlarni planshetga o‘rnatish mumkindir, lekin bu to‘laqonli ishlash degani emas. Sababi, o‘rnatilgan dasturlar smartfonlar uchun mo‘ljallangan. 

Elektron kitob o‘qish, video yoki suratlar tomosha qilish uchun sifatli displeyga ega planshetdan foydalanish ayni muddao. Matnlar yozish, suratlar yuklashda ham planshetlardan foydalanish mumkin, lekin netbuk ancha qulayroq. Agar ushbu harakatlarni doimiy bajarishga hojat bo‘lmasa, planshet orqali ham amalga oshirsa bo‘ladi. Shu tariqa fayllar hamda elektron pochta bilan ishlash yoki forumlarda ishtirok etishingizga to‘g‘ri kelsa, netbuk tanlovi maqbul, albatta. Umuman olganda, bu holatda netbukning qo‘shimcha imkoniyatlarini bilib qo‘yish zarar qilmaydi. Planshetlar esa turli xil o‘yinlar o‘ynash, ma’lumotlar o‘qish, videotasvirlar tomosha qilish, ijtimoiy tarmoqlarda faol bo‘lish uchun eng yaxshi variant. 

Xulosa qilib aytganda, xizmat safari uchun netbuk, sayohat uchun planshet eng yaxshi hamroh bo‘la oladi. Yuqoridagi ma’lumotlardan netbuk ishlashga, planshet esa hordiq chiqarishga imkoniyatlar yaratib berishini anglash mumkin. Eng muhimi, rivojlanib borayotgan texnika faqatgina foydangizga xizmat qilsin.