Амстердам аэропортида сунъий адирликлар ёрдамида шовқинга қарши тўсиқ ўрнатилди

Ажабтовур воқеалар 2-03-2019

Ҳар қандай аэропорт – шовқинли ифлосланиш манбаидир. Агар бу Европадаги йирик аэропортлардан бири бўлса, у ҳолда яқин атрофда жойлашган аҳоли пунктларини ҳимоя қилиш янада мураккаб вазифага айланади. Амстердамдаги баландликка кўтарилаётган ва қўнаётган самолётлар шовқини 20 километргача бўлган масофага тарқаларди. Албатта, бу пойтахт туманлари аҳолиси учун бир қанча ноқулайликлар келтириб чиқарарди. Яна бир учиш-қўниш йўлаги очилгач, вазият янада ёмонлашди. Омадни қарангки, муҳандислар қулай ечимни топишга муваффақ бўлишди.

Нидерландиянинг асосий аэропорти Схипхол Амстердам чеккасида жойлашган ва йўловчи оқими ва юк ташувлари ҳажми бўйича Европанинг энг йирик аэропортлари бешталигига киради. Ҳар куни бу ерда 1000 дан ортиқ самолётлар учиб-қўнади. Пастликда жойлашган Схипхол атрофида табиий адирлар ва шовқинни пасайтирувчи табиий объектлар мавжуд эмас. Бу муаммони ҳал этиш учун аэропорт раҳбарияти муҳандис, архитектор ва дизайнерлар жамоасига мурожаат қилди. Уларнинг ҳамкорликдаги иши натижасида аэропорт жануби-шарқида ғаройиб боғ қурилди.

Баландлиги 2 метрли сунъий адирлар қатори учиш-қўниш йўлакчасидан келадиган шовқинни босишга мослаб жойлаштирилди. Муҳандислар шовқинни самарали ютиши учун адирлар ўртасидаги мақбул масофани ҳисоблаб чиқишди. Улар орасидаги масофа 10 метрга тенг бўлди, жами ана шундай 150 та тўсиқ ўрнатилди. Бундан ташқари, узоқ масофаларга тарқаладиган шовқинга қарши курашиш учун бир неча сув каналлари қурилди.

Сунъий адирлик ва каналли ғаройиб майдонча боғ кўринишида жиҳозланди ва унга “Бьютеншот” номи берилди. Бу ерда пиёдалар ва велосипед учун йўлакчалар бор, дарахтлар экилган. Бироқ энг муҳими, ана шу боғ ёрдамида шаҳар чеккаси аҳолисининг асосий муаммосини ҳал қилиш ва шовқинли ифлосланиш даражасини икки марта камайтиришга эришилди.



МАҚОЛА МАНЗУР КЕЛГАН БЎЛСА ДЎСТЛАРИНГИЗ БИЛАН ҲАМ БЎЛИШИНГ

МАЗКУР БЎЛИМДАН ЭНГ СЎНГГИ МАҚОЛАЛАР



Изоҳлар

Изоҳингиз учун раҳмат. Тез орада сайт маъмурияти уни кўриб чиқиб, чоп этади.
Изоҳ ёзиш

Биринчилардан бўлиб изоҳ қолдиринг!

Биз сизга дунёнинг гўзаллигини эслатиб турамиз. Ишдан, мактабдан ва кўчадаги бошқа юмушлардан ҳориб уйга қайтганингизда, сизни ҳаётнинг оддий ва одатий ташвишларидан бироз чалғита олсак, ютуғизмиз шудир бизнинг.
Яндекс.Метрика

© 2019 XABARDOR.UZ