Barcha mukofot pullarini qashshoqlar uchun uy qurishga sarflagan jahon chempioni

  • 04:13 / 28.10.2016
  • 8135

Qachonlardir filippinlik Menni Pakyao ismli yigitning tushlik uchun hattoki, guruchga ham puli bo‘lmagan. Biroq mustahkam iroda va qat'iyat bu yigitni cho‘qqiga ko‘tardi — u 8 xil vazn toifasida jahon chempioni bo‘lgan dunyodagi yagona bokschiga aylandi.

Misli ko‘rinmagan omadga qaramay, Menni qashshoq bolaligini unutmadi. Jangdan tushgan eng birinchi katta daromadini u Tango aholisi — Sarangani mamlakatining kambag‘al viloyatidagi ona qishlog‘i uchun uy qurdirishga sarfladi. Bu bilan bokschi to‘xtamadi. Hozirda uning pullariga minglab oilalar uchun uylar qurildi.

Pakman Villaj — Menni qashshoqlar uchun qurilgan shinam qishloqni shunday nomlagan. Har bir uy ikki oila uchun mo‘ljallangan va ikki alohida kirish eshigiga ega. Darvoqe, Pakman (Pac-Man) — bu bokschining laqabi.

Yangi qishloqda ochiq va yopiq sport maydonchalari,jamoat bog‘lari va ko‘pfunksional markaz mavjud.

Menni ko‘p bolali kambag‘al oilada voyaga yetdi, ularning kundalik ozuqasi banan va sabzavotlar ildizidan iborat edi. U 12 yoshida oilasiga yordam berish uchun maktabni tashlaydi — u oilaviy novvoychilikda ishlab, ko‘chalarda kulchalar sota boshladi. Shu vaqt u boks bilan shug‘ullana boshladi va uning birinchi murabbiyi amakisi bo‘ldi.

Amakisining aytishicha, Menni yoshlik chog‘idayoq juda qat'iyatli fe'lga ega bo‘lgan: «U har tong yugurishga chiqish uchun soat 4 da turadi. Yarim yillik mashg‘ulotlardan so‘ng shunday fikrga kelganman: “bu yigitdan jahon chempioni chiqadi”. Aynan shunday bo‘ldi».

Hozirda Menni — o‘z mamlakatidagi eng obro‘li va mashhur insondir. Bir necha yillar avval u siyosat bilan shug‘ullandi va kongress saylovlarida g‘olib chiqdi.

Menni o‘zining instagramida achchig‘i kelib, quyidagicha yozadi: «Bu hayot. Men davlat xizmatchisi sifatida nima ish qilganim to‘g‘risidagi savolga jim tursam, tanqid qilishadi. Qilgan ishlarimni namoyish qilsam ham, meni yana tanqid qilishadi».