Bir mehnatkashning hikoyasi

  • 07:04 / 09.02.2015
  • 4773

“Tinimsiz ishlash menga nima berdi?” Bir insoning boshidan kechirganlari

Bugun biz sizga o‘ta mehnatkash odamning boshidan kechirganlari haqida gapirib o‘tmoqchimiz. U mehnat qilishni sevadi. Ammo uning ortidan nimalarga erishdiyu, nimalarni boy berdi?

“Men mehnatkashman. Gohida menga shunday tuyuladiki, yashashdan maqsad ishlashdek. Chunki men 21 oy ta'tilsiz ishladim. Shundan 9 oyida ikkita joyda faoliyat olib borishimga to‘g‘ri keldi.

Nazarimda, mehnatkashlikni yaxshi hislat deya olmayman. Chunki u qaysidir ma'noda yashashga halaqit beradi. Ammo men ana shu ta'tilsiz 21 oyda ko‘p narsa o‘rgandim, bilimim oshdi. Bugun men ana shunday mehnatkashlarga o‘zimning kamtarona maslahatlarimni berib o‘tsam foydadan xoli bo‘lmas, deb o‘ylayman.

Bir qarashda dam olish kerakmasdek

Ko‘pchilik og‘ir o‘tgan ish kunidan so‘ng, dam olishning eng yaxshi usuli uyqu, divan va internet olamiga shunchaki sayr etish deb o‘ylaydi. Ammo bir oz o‘tgach, bunday usullar hordiq chiqarishimizga emas, aksincha baxsiz bo‘lib qolishimizga sababchi bo‘lishini anglab yetasiz. Charchoq ham insondagi bir holat. Bu kuch qolmadi degani emas. Bunday vaziyatda biroz dam olvolib, boshqa ish bilan shug‘ullanish darkor.

Nima qilish lozim? Vaqtdan unumli foydalanishni o‘rganing: turli taomlar tayyorlang, ijtimoiy tarmoqlarda vaqtingizni ketgazgandan ko‘ra, uning o‘rnida do‘stlaringiz bilan uchrashing yoki uyingizni tartibga keltiring. Bu o‘zingizga nisbatan hurmat hissini oshishiga sabab bo‘ladi. Aytgancha, ish vaqtida ham o‘zingizga dam berib turing. Chunki to‘qqiz soatli muntazam ishlashdan so‘ng, kechga borib, o‘zingizni xuddi zombidek his qilishni boshlaysiz.

Charchoq siz o‘ylagandek kechmaydi

Ish faoliyatida charchoq doimiy sodir bo‘ladi, ammo u boshqacha kechadi. Mening fikrimcha, har bir insonda qo‘shimcha kuch zaxirasi bo‘ladi. Keyinchalik tushunishim bo‘yicha, u tugamaydi, aksincha, bizni tark etadi. Shunday xulosa kelib chiqadiki, biz oylar davomida haqiqiy charchoqni his etmaymiz. Keyin esa birdan o‘zimizni holsiz sezishni boshlaymiz. Menda bu holat ta'tilsiz o‘tgan 16 oydan so‘ng sodir bo‘ldi. Shundan 9 oyida ikkita joyda ishlagandim.

Nima qilish kerak? Bu hol sodir bo‘lishidan 3-4 oy oldin ta'tilga chiqish lozim edi. Ana shunda biz sarflagan quvvat yana qayta tiklanarkan. 

Hamkasblaringiz ham ishlashiga imkon bering

Agar siz mehnatkash yoki yumshoq tabiatli inson bo‘lsangiz, unda sizda ko‘p mas'uliyatni zimmangizga olish va o‘zgalar uchun ham mehnat qilish hissi ko‘tarinki bo‘ladi. Buni siz so‘rashmasada, xuddi majburdek bajaraverasiz. Ammo bu yaxshi hislat bo‘lgani bilan ma'lum bir ma'noda salbiy oqibatlarga ham olib kelishi mumkin. Sizning tajribasiz hamkasblaringiz o‘z ishlarini yaxshi o‘rgana olishmaydi, shu bois siz ularning ishlarini to‘g‘irlashga vaqtingizni ketkazib, o‘z ishingizni bajara olmaysiz. Buning ustiga barcha javobgarlik sizning bo‘yningizda bo‘lib qoladi.

Xo‘sh, nima qilmoq zarur? Muammolar haqida jim turish kerak emas. Uni rahbariyat va o‘sha inson bilan birga muhokama qilib olmoq kerak.

Qandaydir muddatda sizda hech qanday g‘oya tug‘ilmaydi

Agar siz aqliy mehnatda uzoq vaqt faoliyat olib borsangiz, nafaqat kuch, balki g‘oyalaringiz ham tugab qoladi. Menda bu holat ta'til olmay ishlayotgan vaqtimning 13-oyida sodir bo‘ldi. Shundan 6 oyida ikkita joyda ishlardim. G‘oya shunday narsaki, u yo‘qolib qolsa, tiklanishi uchun uzoq vaqt talab etiladi. Masalan, menga 5 oyga yaqin ishdagi yangi loyihalar haqida o‘ylab ko‘rishimni so‘rashdi. Bu muddat shunday tez o‘tib ketdiki, hech narsaga erisha olmadim. Dardi fikrim ish bo‘lib qolgandi, boshqa narsalarga bo‘lgan qiziqishim batamom yo‘qolgandi.

Nima qilish kerak? Qiziqarli narsalar bilan shug‘ullaning. Serial ko‘rish o‘rniga kitob o‘qing, do‘konlarga borish o‘rniga shahar aylaning, do‘stingizga qo‘ng‘iroq qiling.

Muammolar haqida gapirishdan qo‘rqmang

Bunday paytlarda ilk muammo yaqin insonlar va do‘stlar bilan bo‘lgan munosabatda yuzaga chiqadi. Sevgan inson bilan esa, 2 oydan so‘ng bo‘y ko‘rsata boshlaydi. Chunki ish tufayli ular bilan ko‘p munosabat qila olmaysiz. Taxminan yarim yildan so‘ng, ulardan kechirim so‘rashimga to‘g‘ri keldi. Ammo men ular haqidagi ko‘p yangiliklarni o‘tkazib yuborgandim. Bunga sabab ham hayotimni ishga bag‘ishlashimdir.

Nima qilish zarur? Yaxshi ko‘rgan insoningiz bilan yurakdan gaplashib oling. Unga nima uchun bunaqa ko‘p ishlayotganingizning sababini tushuntiring. (Men uy ijarasiga pul topish maqsadida ko‘p ishlaganman). Bu tarang vaziyatni yumshatishga katta yordam beradi. Do‘stlaringiz uchun ham bir kunda yarim soat vaqt ajrating. Ularning qo‘ng‘iroqlariga javob bering, ularga SMS xabarlari jo‘natib turing. Eng yomoni, chala ishlaringizni uyga ko‘tarib kelmang. Bu hammasini barbod etadi.

Mehnatkashlar hamkasblariga qaraganda yomon ishlashadi

Dunyoingizni ish bilan ko‘mib tashlasangiz, nafaqat do‘stlaringiz bilan, hatto qilayotgan ishingiz bilan ham turli muammolarga duch kelaverasiz. Ayniqsa, hamkasblaringizdan ancha uzoqlashib ketasiz. Shu bois ular bilan muntazam aloqada bo‘ling. Shunday qilmasangiz ular samarali mehnat qilishadi, siz bo‘lsa qanday bo‘lsangiz shundayligingizcha qolib ketasiz. Chunki ular o‘tgan vaqt mobaynida yangi narsalar haqida bilib olishgan, siz bo‘lsa zimmangizdagi vazifalardan ortmagan bo‘lasiz.

Nima qilmoq kerak? Haftada bir necha soatlarni dunyoqarashingizni kengaytirishga xizmat qiluvchi yumushlarga bag‘ishlang. Masalan, sohangizga taaluqli kitob o‘qing, yangiliklardan boxabar bo‘lib turing.

Hech qachon aldamang

Deyarli barcha rahbarlar vazifalarni tez bajarishlarini xohlashadi. Agar siz bir vaqtning o‘zida ikkita ish joyida faoliyat olib borayotgan bo‘lsangiz, ishlaringiz battar og‘irlashadi. Chunki siz bunday vaqtlarda vazifalarni o‘z vaqtida qila olmaysiz va so‘zingizni ustidan chiqa olmaganingiz uchun yolg‘onchiga aylanasiz.

Nima qilish kerak? Hech qachon bunday qilmang. Qo‘lingizdan keladigan vazifani zimmangizga oling. Agar ulgura olmaydigan ishingiz bo‘lsa, buning sabablarini tushuntiring. Siz baribir uni qisqartira olmaysiz, aldashdan nima naf?

Kibrlanmang

Qanchalik ko‘p majburiyat bo‘lsa, ularni tezda bajarish kerak. Bo‘lmasa o‘rningizni boshqasi bilan to‘ldirishadi. Agar siz ishlarni tez bajarishni boshlasangiz, sizda mag‘rurlik fazilati nish ota boshlaydi. Ammo ko‘za har kuni emas, kunida sinadi. Bir kunmas bir kun hammasiga ulguraman deb o‘ylaysizu, lekin qila olmaysiz. Sharmandangiz chiqadi.

Nima qilish lozim? Barcha ishingizni reja asosida va kibrga berilmay amalga oshirmang.

O‘zingizni qo‘lga oling

Ko‘pchilik donolarning gapiga quloq ossangiz, ularning aksari sizni o‘z sevgan ishingiz bilan shug‘ullanishingizga undaydi. Bekorchi ishlarga, bekorchi so‘zlarga qimmatli vaqtni zoye qilish yaramaydi.

Nima qilish kerak? Ishlaringizni o‘z vaqtida bajaring. Ertaga qolgan ishga qor yog‘adi. Buning uchun eng yaxshi vaqt tong hisoblanadi. Tongda qandaydir baraka bor”.

Teglar