DXX Farg‘ona, Namangan va Surxondaryo viloyatlarida noqonuniy yer sotish holatlarini aniqladi

  • 16:01 / 02.08.2021
  • 232

DXX hamda iqtisodiy jinoyatlarga qarshi kurashish departamentining Farg‘ona viloyati boshqarmalari tomonidan tezkor tadbirda o‘tkazildi. Bu haqda O‘zA xabar qilmoqda.

Xabarga ko‘ra, Beshariq tumanidagi fermer xo‘jaliklaridan birining rahbari Beshariq tuman hokimining qarori bilan qishloq xo‘jaligi mahsulotlarini yetishtirish uchun turmush o‘rtog‘i rahbarligidagi dehqon xo‘jaligiga ajratilgan va tumandagi Toshariq mahallasida joylashgan 35 sotix yer maydonini 29 ming AQSH dollariga sotishga kelishib, oldindan 20 ming AQSH dollarini olgan vaqtda ushlandi.

Shuningdek, Oltiariq tumanidagi Qapchug‘ay qishlog‘ida joylashgan 20 sotix bo‘sh yer maydonini firibgarlik yo‘li bilan 30 ming AQSH dollariga sotishni va hujjatlarni fuqaroning nomiga rasmiylashtirib berishni va’da qilib, kelishilgan mablag‘dan 15 ming AQSH dollarini olgan mansabdor shaxs qo‘lga olindi.

Qayd etilishicha, Bog‘dod tumanida yashovchi fuqaro boshqa bir shaxs rahbarligidagi dehqon xo‘jaligiga qarashli 4,75 gektar yer maydonini mijozga 11 ming AQSH dollari evaziga sotishga kelishib, hujjatlarni uning nomiga rasmiylashtirib berishni va’da qiladi. Ushbu fuqaro firibgarlik yo‘li bilan 11 ming AQSH dollarini olgan vaqtda ashyoviy dalillar bilan ushlandi.

Aniqlanishicha, Namangan viloyati Chortoq tumanidagi MChJdan biriga qarashli 8 gektar yer maydonini bog‘dorchilik uchun ajratib, tuman hokimi qarorini tanishlari orqali rasmiylashtirib berish evaziga mijozdan 7 ming AQSH dollari va 31.5 mln. so‘m olmoqchi bo‘lgan fuqaro ushlandi.

Bundan tashqari, o‘zini Surxondaryo viloyati Bandixon tumanidagi fermer xo‘jaligi rahbari deb tanishtirib, Davlat zaxirasida bo‘lgan yer maydonidan 2 gektarini 50 mln. so‘mga sotishini hamda ushbu yer hujjatlarini tuman hokimiyatida ishlovchi tanishiga 50 mln. so‘m berib hujjat qilib berishini va’da qilib, jami 100 mln. so‘m so‘raydi va ushbu pulni olgan vaqtida ashyoviy dalillar bilan ushlandi.

Hozirda ushbu shaxslarga nisbatan Jinoyat Kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.