Ечим топилди: 1 триллион дона дарахт экиш ва глобал исишни тўхтатиш

Табиат 14-03-2019

Саноати ривожланган мамлакатларга уларнинг атмосферага чиқараётган карбонат ангидрид гази миқдорини камайтириш мақсадида таъсир кўрсатиш кўп ҳолларда самарасиз бўлгани сабабли экологлар муаммога бошқа томондан ёндашишга қарор қилишди.

Яқиндан бошлаб ўрмон кенгликлари нафақат атмосферага кислород етказиб бериш манбаи, балки антропоген СО2 нинг ортиқча ажратилишига қарши курашувчи кучли кураш воситаси ҳисоблана бошланди. Табиийки, тарози палласини керакли томонга оғдириш ва иссиқлик гази тўпланишининг олдини олиш учун дарахтлар жуда кўп бўлиши керак. Швейцариялик олимлар яқинда ўтказилган конференцияда бунинг учун 4 триллион туп дарахт зарурлигини маълум қилишди.

Мавжуд маълумотларга кўра, сайёрамизда 3 триллионга яқин дарахт ўсади. Карбонат ангидрид газининг саноатда чиқарилиши эса йилига 10 гигатоннани ташкил қилади. Швейцариялик экологларнинг ҳисоб-китобларига кўра, 1-1,2 триллион туп дарахт газ утилизацияси муаммосини ҳал қила олади. Бунда қўшимча ўрмон массивларини ташландиқ ва фойдаланилмаётган ерларга жойлаштириш мумкинлиги, шунинг учун ҳам қишлоқ хўжалиги ерларини қисқартирмаслик қайд этилган. Албатта ушбу ҳудудларнинг бари дарахтларнинг кўплаб турлари учун тўғри келмайди. Шу туфайли чўл зоналари ва саноатга ажратилган ерларга дарахтларнинг мос келувчи турларини синчковлик билан танлаш лозим.

Экологларнинг чақириғига Австралия биринчилардан бўлиб жавоб берди. Бу мамлакат ҳукумати 30 йилга мўлжалланган давлат дастури доирасида ўз ҳудудида 1 миллиард туп дарахт ўтказиш истагини билдирди. Бироқ бу зарурий миқдорнинг 1/1000 қисми холос. Австралияда кам фойдаланиладиган ерлар борлиги ҳисобга олинса, у ўз ҳудудида бундан ҳам кўпроқ дарахтни жойлаштириши мумкин эди.

Бироқ эзгу мақсадларнинг бари молиялаштиришга бориб тақалади. Шу боис ташаббусни амалга ошириш учун етарли моддий маблағ ва илмий-техник базага эга бўлган ривожланган мамлакатлар биринчи навбатда жавоб беришлари лозим. Ҳозирда мавжуд бўлган 3 триллион туп дарахт ҳақида ҳам унутмаслик жоиз. Экологлар диққатини мавжуд дарахтларни сақлаш ва рационал фойдаланишга қаратиш керак. Чунки эндигина экилган дарахтлар ўн йиллар ўтгачгина ўсиб, сайёра атмосферасига катта таъсир кўрсатиш салоҳиятига эга бўлади.




МАҚОЛА МАНЗУР КЕЛГАН БЎЛСА ДЎСТЛАРИНГИЗ БИЛАН ҲАМ БЎЛИШИНГ

МАЗКУР БЎЛИМДАН ЭНГ СЎНГГИ МАҚОЛАЛАР



Изоҳлар

Изоҳингиз учун раҳмат. Тез орада сайт маъмурияти уни кўриб чиқиб, чоп этади.
Изоҳ ёзиш

Биринчилардан бўлиб изоҳ қолдиринг!

Биз сизга дунёнинг гўзаллигини эслатиб турамиз. Ишдан, мактабдан ва кўчадаги бошқа юмушлардан ҳориб уйга қайтганингизда, сизни ҳаётнинг оддий ва одатий ташвишларидан бироз чалғита олсак, ютуғизмиз шудир бизнинг.
Яндекс.Метрика

© 2019 XABARDOR.UZ