Энг бадавлат меросхўр жониворлар

Ажабтовур воқеалар 4-03-2019

Forbes ўз эгаларининг кўп миллионли мулкини мерос сифатида қўлга киритган омадли жониворлар рўйхатини тузди.

Шупет лақабли бирма зотли мушук 19 февраль куни вафот этган дизайнер Карл Лагерфельдга тегишли. У ўз эгасига тегишли мулкнинг бир қисми, яъни 200 миллион долларни мерос сифатида олиши мумкин деб ёзмоқда Би-би-си. Мода оламининг вакили 2015 йилда шундай деганди: “Шупетнинг ўз мулки бор, у меросхўр. Агар менга бирор нима бўлса, унга ғамхўрлик қилган киши ҳеч нимага зориқмайди”.

XVII асрдаёқ француз кардинали Ришелье ўз жамғармасини 14 та мушукка қолдирган. Афсонага кўра, яқинлари Ришельенинг истагини қўллаб-қувватлашмади ва муаммони кескин - барча жониворларни ўлдириш йўли билан ҳал қилишди.

Вақт ва давр ўзгаради, бироқ эгаларининг ўз уй ҳайвонларига боғлиқлиги ва улар учун фаровон ҳаётни таъминлаш истаги ўзгармаслигича қолди. Forbes омадли меросхўр жониворлар рўйхатини тузди.

  • Гюнтер IV овчаркаси — 375 млн доллар
  • Шимпанзе Калу — 60 млн доллар
  • Опра Уинфри итлари — Сэди, Санни, Лорен, Лейла ва Люк — 30 млн доллар
  • Мушук Блэки — 25 млн доллар.
  • Товуқ Жиго — 16 млн доллар
  • Болонка Трабл — 12 миллион доллар
  • Чихуахуа Кончита — 11,3 миллион доллар

1992 йил немис графиняси Шарлотта Либерштайннинг вафотидан кейин унинг 224 миллион фунт стерлинглик мулки Гюнтер III овчаркасига ўтди. Гюнтер III ўлимидан кейин мерос Гюнтер IV га қолди. Ит илгари Мадоннага тегишли бўлган ҳашаматли виллада яшайди, кабриолетда Майами бўйлаб саёҳат қилади ва оролларда дам олади.

2006 йилда миллионер аёл Кенмор графинясининг қизи Патриция ОʼНил мулкининг асосий қисми, шунингдек Жанубий Африкадаги ерини шимпанзега васият қилди. Қолганини эса ит ва мушукларга. Калуни ёқтирмаган графинянинг турмуш ўртоғи эса ҳеч нима олмаслиги керак эди. ОʼНил маймунни Конгодан олиб келган, номаълум киши томонидан дарахтга боғланган жониворнинг ҳаётини сақлаб қолган.

Калунинг тақдирига дунёдаги энг бадавлат маймунга айланиш ёзилмаган экан: 2010 йилда Патриция ОʼНил молия фирибгарларининг қурбонига айланди ва инқирозга учради. Аввалги миллион долларлик мулкдан бор-йўғи 100 минг фунт қолди.

Тилларанг ретриверлар Люк ва Лейла, кокер-спаниель Сэди ва спрингер-спаниель Санни ҳамда Лорен америкалик телебошловчи Опра Уинфрига тегишли. Опра ижтимоий тармоқларга уларнинг суратларини мунтазам равишда жойлаштириб боради. Уларга 30 миллион доллар миқдоридаги алоҳида жамғарма ҳам ажратган.

1988 йилда мушук Блэкига миллионер, антиквариатлар билан савдо қилувчи Бен Ри 25 миллион доллар миқдоридаги мерос қилди. Ҳаётлик вақтида Рининг 15 та мушуги бўлган. Ўз эгасидан кўп яшаган мушук сифатида режиссёрнинг васиятига кўра, жами мулк унга ўтди. Қариндошларига бир тийин ҳам тегмади. Ри бойлигининг катта қисмини учта катта хайрия ташкилотларига унинг севимли жониворига ғамхўрлик қилиш кўрсатмаси билан тақсимлаб берди. Блэки энг бой меросхўр мушук сифатида Гиннеснинг рекордлар китобига кирди.

2001 йилда товуқ Жигога британиялик ношир-миллиардер Майлз Блэквелл бизнесини сотиб, ишдан кетишидан аввал васият қилинган 10 миллион фунт стерлинг (16 миллион долларга яқин) тегди.

2007 йилда Трабл лақабли болонка зотли ит ўз эгаси миллиардер Леона Хемлслидан 12 миллион долларни мерос сифатида олди. Хемлсли Нью-Йоркдаги Эмпайр-стейт-билдинг биносига эгалик қиларди. У “фақат кичкина одамларгина солиқ тўлашади” каби гапи билан машҳур бўлганди. Солиқларни тўламагани учун бир ярим йилни федерал қамоқхонада ўтказди. Ҳаётлик вақтида “Зиқналик қироличаси” лақабини олди.

Ит 2011 йилда, 12 ёшида вафот этди. Болонканинг бир йиллик харажатлари 100 минг доллар бўлиб, улардан 8 минг доллари соч турмагига, 1200 доллар эса овқат учун сарфланарди. Асосий харажатлар хавфсизлик учун эди, чунки Траблни ўлдириш ёки ўғирлаб кетиш таҳдидлари тез-тез кузатилган. Мероснинг фойдаланилмаган қисми болонка ўлимидан кейин хайрия жамғармасига ўтказилган.

Чихуахуа Кончита эгаси Майкл Сайлийт Гейл Познер вафотидан кейин дунёдаги энг бадавлат жониворга айланди. 2010 йилда васиятга кўра Кончита учун махсус ташкил этилган, 3 миллион долларли мақсадли жамғарма ва Майамидаги қиймати 8,3 миллион доллар бўлган вилла берилди. Кончита ҳашаматда яшайди, ҳар куни спа-таомилларидан фойдаланиб, Cartierʼнинг нархи 10 минг доллар бўлган зиракларини тақиб юради.



МАҚОЛА МАНЗУР КЕЛГАН БЎЛСА ДЎСТЛАРИНГИЗ БИЛАН ҲАМ БЎЛИШИНГ

МАЗКУР БЎЛИМДАН ЭНГ СЎНГГИ МАҚОЛАЛАР



Изоҳлар

Изоҳингиз учун раҳмат. Тез орада сайт маъмурияти уни кўриб чиқиб, чоп этади.
Изоҳ ёзиш

Биринчилардан бўлиб изоҳ қолдиринг!

Биз сизга дунёнинг гўзаллигини эслатиб турамиз. Ишдан, мактабдан ва кўчадаги бошқа юмушлардан ҳориб уйга қайтганингизда, сизни ҳаётнинг оддий ва одатий ташвишларидан бироз чалғита олсак, ютуғизмиз шудир бизнинг.
Яндекс.Метрика

© 2019 XABARDOR.UZ