Eng zo‘r qimmatbaho toshlar

  • 07:57 / 24.11.2014
  • 5898

Shveytsariyada “Christies” kimoshdi uyi Tseylonning “Blue Belle of Asia” (“Osiyoning moviy go‘zali”) sapfirini (zangori yoki ko‘kish yoqut) 18 million dollarga sotdi. Dunyoning eng qimmatbaho toshining yangi egasining ismi oshkor etilmadi. Quyida dunyodagi eng qimmat va eng muhtasham toshlar bilan tanishishingiz mumkin. 

Tseylonning yostiqsimon shakldagi “Blue Belle of Asia” (“Osiyoning moviy go‘zali”) sapfirining og‘irligi 400 qirotga yaqin bo‘lib, kimoshdi savdosidagi 346ta zargarlik buyumlari to‘plamining bir qismi edi. To‘plam umumiy hisobda 152 million dollarga — uch yil avval 116 million dollarga sotilgan aktrisa Elizabet Teylorning taqinchoqlari to‘plami narxidan ko‘proqqa sotildi. 

2014 yil mayda Jyenevadagi kimoshdi savdosida 24 million dollarga noksimon shakldagi dunyodagi eng yirik ko‘k brilliant — “The Blue” sotildi. Og‘irligi 13,22 qirot bo‘lgan o‘q ko‘k rangdagi brilliant “Harry Winston” brendi vakiliga nasib qildi. 

Shveytsariyada “Christies” kimoshdi uyi so‘nggi fransuz qirolichasi Yevgeniya va qirol Eduard VIIIning rafiqasi Uollis Simpsonning kolleksiyasidagi 7 qirotli brilliantlar bilan bezatilgan tomchisimon ziraklar sotuvga qo‘yildi. Zirak eng qimmat lot deb topilib, 12-15 million dollarga baholandi. 

Og‘irligi 110 qirot bo‘lgan “Quyosh tomchisi” brillianti. 2011 yil 15 noyabrda “Sotheby’s” kimoshdi savdosida 12,4 million dollarga sotilgan. Tosh 2010 yil Janubiy Afrikada topilgan. Bugungi kunda “Quyosh tomchisi” dunyodagi ma'lum sariq brilliantlarning eng kattasi deb tan olingan. 

Soflik darajasi VS2 brilliant “Christie's” kimoshdi savdosida 4,9 million dollarga sotilgan.

2013 yil 7 oktyabrda Gonkongda “Sotheby's” kimoshdi savdosida savdoga qo‘yilgan dunyodagi eng yirik brilliant — og‘irligi 118,28 qirot va ideal darajada sof bo‘lmish rangsiz oval tosh sotildi. Brilliant rekord darajadagi narxga — 30,6 million dollarga sotildi. Avvaliga brilliant 35 million dollarga baholangandi. Tosh bu narxga sotilmagan bo‘lsa-da, baribir kimoshdi savdosida sotilgan eng qimmat rangsiz brilliant bo‘ldi. Tosh 2011 yilda Janubiy Afrikada topilgan edi. Endi toshning yangi egasi unga nom o‘ylab topishi kerak.   

Moviy-zangori “Vittelsbax-Graff” brillianti (35,56 qirot) brillianti ikki kishining sharafiga nomlangan. 2008 yilda mashhur zargar Lorens Graf uni Londonda o‘tgan “Christie's” kimoshdi savdosida 24,3 million dollarga sotib olgan edi. Bu qimmatbaho tosh qayta tarashlangach, vazni yengillashdi, bugungi kunda uning og‘irligi 31,06 qirot. 

2012 yil noyabrda noyob darajada chiroyli, og‘irligi 76,02 qirot “Ersgersog Iosif” 21,48 million dollarga sotildi. 

2013 yil 13 noyabrda “Pushti yulduz” brillianti Jyenevada “Sotheby's” kimoshdi savdosida 68 millin shveysar franki (74,1 million dollar)ga sotilib, savdoda sotilgan eng qimmatbaho tosh bo‘ldi. “Pushti yulduz” (“The Pink Star”)ning og‘irligi 59,6 qirot bo‘lib, “Sotheby's International Jewellery”ning Yevropa va Yaqin Sharq bo‘limi rahbari Devid Bennett uni tabiat yaratgan eng yirik qimmatbaho tosh deb atagan edi. Uning aytishicha, tosh hozirgi kungacha ma'lum bo‘lgan pushti brilliantlarning eng katta va eng pushtisi” hisoblanadi.

Teglar