Eski "Bavariya"lar

  • 04:45 / 10.11.2014
  • 4402

1. "Bavariya" 1971-1974 Yutuqlari: 3 marta Bundesliga g‘olibligi va 1 Chempionlar Kubogi Murabbiy: Udo Lattek Yulduz futbolchilari: Frans Bekkenbauyer, Zepp Mayyer, Gerd Myuller, Paul Braytner.

bavariya-9

Bu jamoaning lideri shak-shubhasiz - Bekkenbauyer edi. Aynan uning 1972-yili Myunxenda o‘tkazilgan Olimpiada o‘yinlarida ko‘rsatgan porloq o‘yinidan keyin, hamma, endi bundan buyog‘iga Bekkenbauyer o‘ynaydigan "Bavariya" nemis futbolida hammadan kuchli bo‘lishini bashorat qila boshlagandi. Undan tashqari tarkibda bir mavsumda 40 ta gol uradigan Gerd Myuller ham bor ediki, "Bavariya" raqiblarni birin-ketin "yer tishlata" boshladi.

Nemis futbolining 70-yillari haqida so‘z ketganda, birinchi navbatda "Bavariya" va "Borussiya" Menxengladbax qarama-qarshiligi ko‘z oldimizga keladi. Bir tomonda klublar bilan ishlashda katta tajribaga ega Lattek tursa, ikkinchi tomonda dunyoga Gyunter Netser, Yupp Xaynkess, Berti Fogs, Alan Simonsen, Uli Shtilike kabi fenomenlarni yetishtirib bergan daho - Vaysvayler turardi. Agar, o‘sha raqobatda "Bavariya" emas, "Borussiya" yutib chiqqanida, ehtimol hozir Germaniya futboli bayroqdori myunxenliklar emas, menxengladbaxliklar bo‘lishi ham mumkin edi.

bavariya-10

1974 yili "Bavariya" hozirgi YeChL ga to‘g‘ri keladigan o‘sha vaqtdagi Chempionlar Kubogini qo‘lga kiritadi va yana ikki mavsum bu sovrinni o‘zlarida saqlab qolishadi. Aynan shu jamoa asosida qurilgan GFR terma jamoasi ham 1974-yili jahon chempioniga aylanishgan edi.

2. "Bavariya" 1981-1987

Yutuqlari: 3 marta Germaniya chempionligi, 2 marta Germaniya Kubogi. Murabbiy: Pal Chernai (1981-83) va Udo Lattek (1983-1987) Yulduz futbolchilari: Jan-Mari Pfaff, Lotar Matteus, Klaus Augentaler, Karl-Xayns Rummenegge, Paul Braytner.

bavariya-5

Bekkenbauyer va Myuller futbolni tark etgach, "Bavariya" ham oldingi "Bavariya" bo‘lmay qoldi. Ikki yil Pal Charnai hech qanday chora o‘ylab topa olmagach, unga javob berilib, murabbiylik postiga Udo Lattek qaytarildi. Shuningdek, jamoa logotipi ham o‘zgartirildi, yangi imij yaratildi.

Lattek qaytgan yiliyoq Germaniya Kubogini yutadi, keyingi mavsumlarda esa ketma-ket uch marotaba Germaniya chempionligiga erishildi. Shunday qilib, Lattek Germaniya chempionatini 8 marta yutgan yagona murabbiy bo‘lib qoladi.

Bu jamoaning yetakchisi - Karl-Xayns Rummenigge edi. Bu hujumchining futbolga kirib kelish tarixi qiziq. U bank xizmatchisi bo‘lib ishlar, futbol bilan esa, havaskor tarzda shug‘ullanar edi. Kunlardan bir kuni Karl ota-onasi bilan gaplashadi va hayotini butkul futbolga bag‘ishlashga qaror qiladi. Keyinchalik, bundan hech kim afsuslanmadi. U ikki marta Yevropning eng yaxshi futbolchisi deya e'tirof etilgan.

bavariya-6

Lattekning ikkinchi davrida Germaniyada uning jamoasi bilan raqobatlasha oladigan raqib qolmadi. Myunxenliklar Bundesligada o‘zlarini xuddi o‘z xo‘jaligida kezib yurgan xo‘jayin kabi his qilishardi. Faqatgina bir mavsumda "Verder" qarshilik ko‘rsatgan, lekin tezda tan berishga majbur bo‘lgan edi. Rummenigge va Lattek ketgandan keyin ham Lotar Matteus bu jamoani yuqori saviyada o‘yin ko‘rsatishini ta'minlab turgan edi.

3. "Bavariya" 2000-2001

Yutuqlari: Germaniya chempionligi, YeChL g‘olibligi, Qit'alararo Kubok. Murabbiy: Ottmar Xitsfel'd Yulduz futbolchilari: Oliver Kan, Shtefan Effenberg, Jovanni Elber, Mexmet Sholl.

bavariya-3

O‘tgan asrning oxirgi o‘n yilligi jamoa uchun qora bulutlar ostida o‘tdi. Bu yillar ichida jamoa mavsumni 10 chi o‘rinda tugatgan mavsumlar ham bo‘ldi, ketma-ket murabbiylar almashtirilgan mavsumlar ham bo‘ldi. Jamoani Lerbyu, Ribbek, Bekkenbauyer, Trappatoni, Augentaler kabi nomdor murabbiylar bu tushkunlikdan qutqarish uchun behuda urinishdi...

Faqat 1999 yili "Bavariya" boshqaruviga Ottmar Xitsfeld kelibgina ahvol o‘zgardi. "General" laqabli bu talabchan murabbiy birinchi mavsumidanoq jamoani ichki chempionatda yaqqol peshqadamga aylantirdi. Shuningdek, "Bavariya" - "Manchester Yunayted" ishtirokidagi Barselona finali ham o‘sha yili bo‘lib o‘tgan edi.

O‘sha ma'shum finaldan keyin jamoa tezda o‘ziga kelib oladi va Yevropa chempionligini qo‘lga kiritish uchun qaytadan kurash boshlaydi. Va keyingi yiliyoq maqsadga erishiladi. Chorak-finalda "qizil iblislar" ikkala o‘yinda ham mag‘lub etilib, o‘ch olingan holda, yarim-finalda "Real", finalda esa, "Valensiya" taslim qilinadi.

Bu jamoaning yuragi - Shtefan Effenberg edi. Aytish mumkinki, u bir vaqtning o‘zida bir necha futbolchi ish kuchiga ega edi. U maydonda hamma ishni bajarar - o‘yinni tuzardi, raqiblarnikini esa buzardi va hakamlarni ham sergak ishlashga majbur etardi. Uning jamoadoshlari yaxshiyamki unga raqib emasliklariga shukrona keltirib o‘ynashar edi.

bavariya-4

O‘sha yili Germaniya chempionligi oxirgi turning oxirgi daqiqasida, "Gamburg" va "Bavariya"ning o‘zaro uchrashuvida hal bo‘lgan, o‘yin vaqti yaqinlashgani sayin, gamburgliklar chempionlikka tayyorlanishar edi. Hakam tomonidan qo‘shib berilgan oxirgi daqiqada Patrik Anderson kiritgan gol, myunxenliklarning chempion bo‘lib ketishini ta'minlagan edi.

4. "Bavariya" 2004-2006

Yutuqlari: 2 marta Germaniya chempionligi, 2 marta Germaniya Kubogi Murabbiy: Feliks Magat Yulduz futbolchilari: Roy Makay, Klaudio Pisarro, Mixael Ballak, Lusio.

bavariya-1

Temir Magat nomi bilan mashhur bo‘lgan bu murabbiy, ikki yil qatorasiga oltin dubl' qayd etgan yagona murabbiydir. U bunga o‘zining o‘ta qattiqqo‘lligi, tinimsiz turli og‘ir mashg‘ulotlar o‘tkazishi (u har safar mashg‘ulotlarda shogirdlarini 50 marotaba maydon atrofida yugurtirar edi) orqali erishgan. Uning shiorlari ham o‘ziga xos edi: "Muvaffaqiyatlarga ishonch - og‘riqlarni unuttiradi" va "Haqiqiy professionallar doim jangga tayyor turmog‘i lozim".

bavariya-2

Bu jamoada "Bayer" dan sotib olingan Ballak va Lusiolar liderlik qilishardi. Keyinroq ularning o‘rnida "Bavariya" maktabidan Shvaynshtayger va Filipp Lam yetishib chiqadi. Magat va'da qilgan muvaffaqiyatlarga ham erishiladi, lekin, xalqaro arenalardagi o‘yinlarda jamoa a'zolaridagi toliqish sezilib qoladi. Shu sababli, jamoa rahbariyati birinchi sabab paydo bo‘lishi bilanoq, unga ketish eshiklarini ko‘rsatib qo‘yishadi.

5. "Bavariya" 2012-2013

Yutuqlari: Germaniya chempionligi, Germaniya Kubogi, YeChL g‘olibligi Murabbiy: Yupp Xaynkess Yulduz futbolchilari: Aren Robben, Tomas Myuller, Bastian Shvaynshtayger, Frank Riberi.

bavariya-7

Yupp Xaynkess qo‘li ostida jamoa tarixidagi eng yulduzli tarkib yig‘ilgan edi. Bu orzulardagi jamoa, ya'ni, "drim-tim" deb ham atalgan tarkib bo‘ldi. Bu davrda barcha rekordlar yangilandi, bu jamoaning o‘yinlarini efirga uzatish har qanday telekanal uchun obro‘ hisoblana boshlandi. Tomoshabinlar ham bu jamoa o‘yini vaqtida faqat o‘yinni tomosha qilish bilan mashg‘ul bo‘lar edilar.

Mavsumdagi 54 ta o‘yinning 46 tasida g‘alaba qozonildi, va bu g‘alabalarning aksar qismi juda yirik hisoblarda qayd etilar edi. Masalan, "Gamburg" bilan 9:2.

bavariya-8

Muddatidan oldin, Bundesliga yakuniga hali 6 ta tur borligida chempionlik masalasi hal qilindi - bu jamoaning 23 chi chempionligi bo‘ldi. Lekin, hali mavsumdagi yutuqlar oldinda kutib turgan edi. "Uembli" finalida ham, Berlindagi Germaniya Kubogi finalida ham dortmundliklar tor-mor etilgach, bu yutuqlar to‘kis bo‘ldi. Shunday qilib jamoa tarixidagi ilk trebl nishonlandi.

Teglar