Facebook’dan foydalanmasangiz nima bo‘ladi?

  • 10:12 / 15.02.2019
  • 3033

«Facebook kundalik hayotimiz va kommunikatsiyani keskin o‘zgartirib yubordi. Biroq undan voz kechsak nima sodir bo‘ladi? Bugungi kunda eng yirik tadqiqotda amerikalik olimlar ana shu savolga javob topishdi. Natijalar kishini hayratga soladi», – deb yozmoqda Die Welt nemis nashriyoti.

«Oyiga 2,3 mlrd faol foydalanuvchilarga ega (2018 yil ma'lumotlariga ko‘ra) Facebook hali ham dunyodagi eng yirik ijtimoiy tarmoq sanaladi. 2,3 mlrd – bu insoniyatning deyarli uchdan biri. O‘rtacha statistik foydalanuvchi Facebook va uning sho‘'ba platformalari - Instagram va Messenger’da kuniga 50 daqiqasini o‘tkazadi»,- deya qayd etadi jurnalist Mattias Jordano.

Yaqinda britaniyalik olimlar tomonidan o‘tkazilgan, 1,2 ming kishi ishtirok etgan tadqiqotga ko‘ra, o‘rtacha statistik kishi 1-2 ming dollar evaziga Facebook’dan bir yilga voz kechishga tayyor.

Yangi tadqiqot uchun Stenford va Nyu-York universitetlari olimlari bir oyga Facebook’dan voz kechishga tayyor bo‘lgan 2844 nafar foydalanuvchini topishdi. Barcha ishtirokchilar 18 yoshdan katta va Facebook’da kuniga kamida 15 daqiqalarini o‘tkazishgan, deya xabar bermoqda Die Welt.

“Dastlab ular o‘zlarining his-tuyg‘ulari, siyosiy qarashlari va kundalik hayotlari haqidagi batafsil anketani to‘ldirishlari kerak edi. Ishtirokchilarning yarmiga ijtimoiy tarmoqdan voz kechish evaziga to‘lov taklif qilindi. Facebook’dan voz kechish oyiga o‘rtacha 102 dollarni tashkil qildi”, - deyiladi nashrda.

Tadqiqot davomida ishtirokchilar muntazam ravishda o‘z kayfiyatlarini baholash haqidagi xabarni olishdi. Tadqiqot yakunida ular batafsil anketalarni yana bir bor to‘ldirishdi.

«Facebook’dan voz kechgan kishilar siyosiy savodxonligi tekshirilganida ular akkauntlari faol bo‘lgan vaqtdagiga qaraganda ancha past baho olishgan. Bundan Facebook ko‘pincha ma'lumot manbai sifatida qo‘llanilishi, u mavjud bo‘lmaganida ma'lumotlar gazetalardan o‘qilmasligi haqida xulosa qilish mumkin», - deydi muallif.

«O‘rtacha har bir foydalanuvchida bir soatdan ko‘proq bo‘sh vaqt paydo bo‘ldi, faol foydalanuvchilarda esa ikki marta ko‘proq. Ishtirokchilar ko‘proq vaqtlarini do‘stlari, oilalari bilan va televizor tomosha qilgan holda o‘tkazayotganliklarini ma'lum qilishgan».

“Men Facebook o‘rni Twitter, Snapchat, saytlar kabi raqamli narsalar bilan to‘ldirilishini kutgan edim. Bu sodir bo‘lmadi. Men uchun bu kutilmagan sovg‘a”, - deydi Stenford universitetidagi tadqiqot muallifi Metyu Genskov.

Tadqiqot natijalariga ko‘ra, Facebook’dan voz kechish kayfiyat va hayotdan mamnunlikka ham ijobiy ta'sir ko‘rsatar ekan.

«Tajriba yakunida ishtirokchilarning ko‘pchiligi Facebook’dan kamroq foydalanish istagini bildirishgan. Biroq bir hafta o‘tgach, bor-yo‘g‘i 10 foiz ishtirokchi, ikki oy o‘tgach esa bor-yo‘g‘i 5 foiz ishtirokchi ushbu ijtimoiy tarmoqdan foydalanishmagan».

Teglar