Faravonlik sari olib boradigan odatlar

  • 08:04 / 11.03.2019
  • 3488

Muloyimlik

Muloyimlik eng kuchli ig‘vogarni ham tinchlantirishga qodir. Badjahllik va qo‘pollikka aynan muloyim gaplar bilan javob bergan ma'qul. U kuch-quvvatni saqlab qolish va o‘zingizni yo‘qotishlardan asrash imkonini beradi. Muloyimlik sizni mojaroli holatlardan asraydi.

Minnatdor bo‘ling

Har bir vaziyatda minnatdorlikni yodda tuting. Uni ovoz chiqarib, tabassum va ezgu so‘zlar bilan ifoda eting. Odatiy kundalik vaziyatlarda ham minnatdorlik so‘zlarini ayting. Kun davomida minnatdorlikka sabab bo‘lgan barcha voqealarni yodga oling. Vaqt o‘tishi bilan bunday fursatlar tobora ko‘payib borganiga xayron qolasiz.

Doim haqgo‘y bo‘ling

Farovonlik nima? Bu nafaqat moddiy boyliklar, balki qoniqish, ishonch, mo‘l-ko‘llik va baxtni ham his etishdir. O‘zingizning haqiqiy istaklaringizni ifoda etish, ularni baralla aytishni o‘rganing. Siz uchun zarur bo‘lmagan voqea va g‘oyalardan voz kechish va «yo‘q» deyishni ham o‘rganish lozim. O‘z istaklaringizni botirlik bilan ochiq aytishingiz bilan hayotingiz o‘zgacha bo‘yoqlarda jilvalanadi. Axir bu holatda ularni amalga oshirish ancha oson kechadi.

Rostgo‘ylik va ishonch hissidan tashqari shaxsiy mas'uliyat hissini ham rivojlantirish kerak. Aynan shunda rostgo‘y bo‘lishingiz va haqiqatni bemalol aytishingiz mumkin.

Ijobiy fikrlash tarzi

O‘zingiz va yaqinlaringiz nutqiga e'tibor bering. Salbiy so‘zlarni qo‘llab, yoqimsiz mavzular va vaziyatlarni tasvirlash hollari tez-tez yuz beradimi? Barcha so‘zlarni ijobiy sinonimlarga almashtirish mumkin. Ana shunda nutqingiz bunyodkorlik ruhida bo‘ladi. Yodda tuting, aynan fikrlash tarzi va nutqingiz atrofdagi olamni shakllantiradi.

Yoqimli narsalar haqida ko‘proq gapirishga harakat qiling: olamdagi go‘zallik, odamlarning iste'dodini payqashga harakat qiling, minnatdorlik va maqtov so‘zlarini ayting. O‘zgalarga nisbatan salbiy baho berish yaramaydi. Axir siz ularni o‘z hayotingizga jalb etishni istamaysiz-ku, shundaymi?