Farzandini parvarish qilish bilan birgalikda tadbirkorlik faoliyatini yuritish sirlari

  • 06:27 / 24.11.2018
  • 3489

Har bir kuningizni aniq rejalashtiring. Sutkada 24 soat faqat ona rolini o‘ynamaslik uchun alohida ish soatlarini belgilang.

Foto: Fotolia

Farzandning tug‘ilishi – qadriyatlarni qayta o‘ylash va o‘z-o‘zini izlash uchun g‘aroyib davr. Organizmning qayta tiklanishi uchun talab etiladigan jismoniy va ruhiy qiyinchiliklarga qaramay, aynan bu davr “yangi hayot” boshlash uchun ideal payt. G‘arbda farzandni parvarish qilish bilan birgalikda tadbirkorlik faoliyatini yuritish – keng tarqalgan amaliyot. Buyuk Britaniyada bunday ayollarni «mumpreneur» deb atashadi. 2025 yilga kelib, ular 217 600 dan ortiq ish o‘rinlarini yaratish va qo‘llab-quvvatlashi kutilmoqda.

Karera jihatidan rivojlanishning yo‘qligi, maoshning kamligi, rahbariyatning munosabati, enaga va bog‘chalar narxining qimmatligi, moslashuvchan jadval va ishni farzand tarbiyasi bilan birgalikda olib borish imkonsizligi – tug‘ish ta'tilidagi ayollarning shaxsiy biznesini ochishga undaydigan asosiy sabablar. Eng ayovsiz tug‘ish ta'tili AQShda: bor-yo‘g‘i 12 hafta (Kaliforniyada – olti hafta). Amerikalik ayollar yangi tug‘ilgan chaqaloq bilan ko‘proq vaqt o‘tkazish uchun deyarli ish joyida farzandli bo‘lishadi. 

Amerikalik jurnalist va konsultant Lisen Shtrombeg o‘zining «Work Pause Thrive» kitobi uchun tadqiqot o‘tkazgan va bola tug‘ilganidan keyin 72 foiz ayollar ishga qaytganini aniqlagan. Britaniyalik ayollar maoshining katta qismini enaga uchun haq to‘lashga ishlatishlarini aytishgan. 71 foiz onalar esa farzandiga ko‘proq vaqt ajratmagani uchun o‘zini aybdor his qilishi aniqlangan.

G‘oyani tanlang

Kengroq nazar soling. Xobbingiz sohani belgilashda asqotishi mumkin. Tug‘ishgacha politsiya xodimi bo‘lib ishlagan Betani Iton farzandini foydali yegulik bilan parvarishlash maqsadida kokosli CoYo yogurtini ishlab chiqqan.

Foto: Fotolia

Barcha qiziqishlaringiz (yarim tunda nima uchun uyg‘onishga tayyorsiz), orzularingiz (kelajagingizni qanday ko‘rishni istaysiz) ro‘yxatini tuzing. Bilim va ko‘nikmalaringizni tahlil qiling. Kirimni hisoblang (hozirning o‘zida daromad olib kelayotganlarini). Insonlarga keltirishingiz mumkin bo‘lgan foydani baholang. Javoblarni bir-biri bilan taqqoslab, biznesni ochish uchun g‘aroyib g‘oyalarni topishga muvaffaq bo‘lasiz.

Mahsulot lineykasini aniqlang

Turli narx darajasiga esa bir necha mahsulotlar guruhini yarating. Shu yo‘l bilan xaridorlarga tanlov imkoniyatini taqdim etasiz. Yodda tuting: mahsulot yoki xizmat bir vaqtning o‘zida “bozorda bo‘lishi” va undan farqlanishi lozim. Buning uchun raqobatchilar, ularning narxlari va bozorda o‘zini namoyish etish usullarini o‘rganing. Siz avtomatik tarzda narx bo‘yicha emas, yaratayotgan qadriyatingiz bo‘yicha raqobat qilishni boshlaysiz. Ideal mijozingizning asosiy jihatlari, ehtiyojlarini yozib chiqing. Xaridor uchun tushunarli tilda mahsulot taklifini tuzing.

Biznesning ishga tushishini tezlashtirish va kamroq qoqilish uchun mashhur brendning franshizasini qo‘lga kiritish ham mumkin. Unda bari siz uchun o‘ylangan. Bu vaziyatda sizning asosiy vazifangiz xodimlarni topish va reklamani yo‘lga qo‘yishdan iborat bo‘ladi.

Kirish trafigini ishga tushiring

Bu bosqichda reklama kanallaridan foydalanish muhim: SMM, kontekst reklama (yandex, google), oflayn-reklama va hamkorlik. Shaxsiy brendni yaratish, OAVdagi nashrlar, televideniye va radiodagi chiqishlar, netvorkingga alohida e'tibor qaratish lozim. Targ‘ibotning har bir usulidan kelayotgan foydani kuzatib boring. Ulardan eng samaradorlarini tanlab oling.

Foto: Fotolia

Reklama e'lonlarini modellashtirishda mahsulot yoki xizmatdan foydalanishning ijobiy jihatlarini ko‘rsatib, mijoz tilidan so‘zlang.

Aloqa uchun ma'lumotlar to‘plash uchun (telefon, e-mail) reklamaga bepul takliflar joylang. Ilgari amalga oshirilgan loyiha va fikrlar a'lo darajada ta'sir qiladi. Ular haqida istiqboldagi mijozlarga hikoya qiling. Ijtimoiy isbot – biznesning muhim jihati. Ba'zida amalga oshirilgan birgina loyiha turli reklama shiorlari aks etgan saytga qaraganda ko‘proq ma'lumot beradi.

Ustuvorliklarni belgilang

Biznesning huquqiy jihatlarini o‘rganing, mablag‘ni to‘g‘ri taqsimlang. Biznesingizning aniq tasviri miyangizda bo‘lishi kerak. Yuridik shaxs yoki YaTT qanday ochiladi? Kassa qanday qilib o‘rnatiladi va ro‘yxatdan o‘tkaziladi? Qayerga, qanday soliq to‘lanadi?

Dastlab yangi ma'lumotlarning ko‘pligi kishini aqldan ozdiradi. Biroq “filni” mayda bo‘laklarga ajratsangiz, shaxsiy biznesga asos solish u qadar qiyin emasligiga amin bo‘lasiz.

Teglar