Fotojamlanma: Yaponiyada sakura odatdagidan 5 kun avval gulladi

  • 19:14 / 21.03.2017
  • 11675

Yaponiyada sakura gullash mavsumi ochiq deb e'lon qilindi. Yapon olchasining bu yildagi ilk gullari Tokiodagi Yasukuni ibodatxonasidagi maxsus "nazorat" daraxtida paydo bo‘ldi.

Joriy yilda Tokioda sakura oxirgi 9 yil ichida birinchi marta, hattoki janubiy hududlardan ko‘ra erta gulladi. Meteorologlarning statistikasiga ko‘ra, Tokioda sakura o‘tgan yildagiga o‘xshab odatdagidan 5 kun oldin gulladi. 

Tokioda rasman sakura gullashi mavsumi maxsus "nazorat" daraxtida ilk 5 dona gul ochilgandan keyin ochiq deb hisoblanadi. Bu daraxtni Yaponiya meteorologik boshqarmasi inspektorlari kuzatib borishadi. Ular mart boshidan barcha olchazorlarni nazorat qilib borishadi. Bunga mas'ul xodim 21 mart ertalab Yasukuni ibodatxonasiga kelib, sakura shoxlarida pushti g‘unchalar nish urganini qayd qildi va "Tokioda sakura gulladi" deb e'lon qildi. 

Biroq bu xabar omma tomondan odatdagidek jo‘shqin qarshilanmadi, chunki bugun Tokioda yomg‘ir yog‘moqda. Biroq yapon nashrlari fotomuxbirlari yomg‘irli ob-havoga qaramay, mamlakatning bosh sakura daraxtidagi har bir g‘unchani kameraga sinchkovlik bilan qayd qilishmoqda. 

Sakuraning to‘liq gullashi vaqti mart oyi oxiri yoki aprel boshiga to‘g‘ri keladi. Bu vaqtda bog‘lar va olchazorlar pushti rangdagi gullarga burkanadi. Shu kunlari minglab odamlar bu mo‘jizadan zavq olish uchun bog‘larga oshiqadilar va sakura daraxtlari ostida pikniklar uyushtiradilar.