Futbolchilar nishondan adashganda

  • 04:24 / 10.11.2014
  • 3496

Guanchjoudagi 2010 yilgi Osiyo o‘yinlari chorak-finalida to‘qnashgan Qatar va O‘zbekiston terma jamoalari o‘yini vaqtida darvozabonimiz Temur Jo‘rayev raqib hujumchisiga to‘pni qanday oldirib qo‘yganiyu, qatarlik hujumchi darvozabonni qanday aldab o‘tgani va 7 metrlik darvoza qarshisida 2 metr masofadan turib, to‘pni qayoqqa qaratib dumalatib yuborgani esingizdadir? O‘sha kechadan keyin qatarlik nishonni bexato ura olmaydigan bu futbolchi you tube yulduziga aylanib ketgan edi.

Yuqoridagi kabi voqea yuz yilda bir marta bo‘ladi deb o‘ylasangiz adashasiz. Shu oktabr oyining o‘zida jahon futbolida shunday holatlarning yetti marta yuz berganiga guvoh bo‘ldik. Siz ham guvoh bo‘ling.

1. Xose Kalexon

29 oktabr kuni "Napoli" "Atalanta" maydonidan 2 ochko yo‘qotib qaytdi. O‘yinning 2 chi taymida Kalexon g‘alaba to‘pinin kiritishi ham mumkin edi. Lekin, gol urmaslikning iloji yo‘q vaziyatda, bo‘m-bo‘sh darvozaga yarim metrdan noaniq zarba bergan Italiya chempionati to‘purari haligacha buni qanday amallaganiga hayron bo‘lib yurgan bo‘lsa kerak.

2. Mario Balotelli Italiyalik hujumchini Angliyada hamma tanqid qilmoqda va bu tanqidlar o‘rinli. Chunki u haligacha APL o‘yinlarida o‘zining gollari hisobini ochgani yo‘q. "KPR" bilan o‘tgan og‘ir o‘yinda ham u jamoa uchun hech qanday foyda keltira olmadi. Bir vaziyatda esa darvozabondan qaytgan to‘p o‘ziga kelib tushganida, to‘pni himoyasiz qolgan darvozaga joylab qo‘yish o‘rniga osmonu falaklarga tepib yubordi.

3. Ander Kapa "Eybar" hujumchisi umridagi eng yaxshi vaziyatni qo‘ldan chiqardi. Axir u "Barselona" darvozasiga gol kiritgan futbolchiga aylanishi mumkin edi. Lekin Klaudio Bravoni ham aldab o‘tgan Ander hal qiluvchi zarbani yo‘llashda oyoqlari qaltiradi. Bu paytda tabloda 0:0 hisobi yonib turar, bu omadsizlikdan keyin "Eybar" jamoasi 3 ta gol o‘tkazib yuborgandi.

4. Aver Mabil "Adelaida Yunayted"ning 19 yoshli hujumchisini "Perta" bilan o‘yingacha deyarli hech kim tanimas edi. U ham o‘ziga uzatilgan zargarona pasni yo‘qqa chiqargach, internet tarmoqlari orqali mashhur bo‘lib ketdi. Aver Mabil Avstraliya yoshlar terma jamoasi a'zosi hisoblanadi. Unga o‘z ustida ko‘proq mashq qilishini tilab qolamiz.

5. Karlos Askui 23 yoshli "Estudiates" (Argentina) yarimhimoyachisi Urugvayning "Penyarol" jamoasi bilan Kopa Sudamerikana doirasida o‘tgan uchrashuvda "qovun tushirdi". Balki, u o‘zining hujumchi emasligi bilan o‘zini oqlashga harakat qilar, lekin bu masofadan darvozabonlar ham gol ura oladi.

6. Xakan Chalxanoglu "Bayyer" YeChL guruh bosqichida "Benfika"ni qabul qilgan bahsda jamoa 3:1 hisobida g‘alaba qozondi. Xakan Chalxanoglu bitta gol bilan g‘alabaga o‘z hissasini qo‘shdi ham. Lekin quyidagi vaziyatda yana bitta gol urish kerak bo‘lgan vaziyatda omadsiz harakat qildi.

7. Per Obameyang "Bayyer" "Benfika"ni qabul qilayotgan o‘yinga parallel vaqtda Dortmundda boshqa bir nemis jamoasi "Anderlext"ni sinovdan o‘tkazayotgan edi. Obameyang o‘ta qiyin vaziyatlarda marta darvozani ishg‘ol etdiyu, xet-trikni amalga oshirish mumkin bo‘lgan holatida bolalarcha xato qildi.

Teglar