Har kuni tvorog yeyishning natijasi qanday bo‘ladi?

  • 07:55 / 11.03.2019
  • 6695

Tvorog foydali ekanini hamma biladi. Uning tarkibida kalsiy, oqsil va kazein mavjud. Ayrim bolalar uni yoqtirishmaydi. Buvilar esa uning foydasi sabab mittivoylarni ushbu yegulikni iste'mol qilishga majbur qilishadi. Katta yoshdagilar esa unga ko‘pincha befarq bo‘lishadi. Bu mahsulotni har kuni iste'mol qilganimizda organizmda nima sodir bo‘ladi? Avval boshdanoq kelishib olaylik, albatta nonushta, tushlik va kechki ovqatga tvorogni turli ko‘rinishlarda iste'mol qilish emas, uni har kuni biroz miqdorda iste'mol qilish haqida so‘z yurityapmiz. Turli tadqiqot natijalariga tayangan holda masalaga oydinlik kiritdik.

Foto: Pixabay

Moddalar almashinuvi

Tvorog har kuni iste'mol qilinsa, uning tarkibidagi V guruhi vitaminlari metabolizmni normallashtiradi. V12 vitamini esa miyaning to‘laqonli ishlashida yordam berib, temirning samarali o‘zlashtirilishiga xissa qo‘shadi. Tvorogdagi riboflavin tiamin bilan birgalikda uglevodlarni quvvatga aylantiradi, panteon kislotasi esa oqsil, yog‘lar, uglevod va aminokislotalar almashinuvida ishtirok etadi.

Mushaklar

Tvorog va undan tayyorlangan taomlar ratsioningizga kiritilgach, mushak massasi o‘sayotgani va mushak korseti va suyaklar mustahkamlanayotganini sezasiz. Sportchilar uyqudan oldin bejiz tvorog yoki oqsilli yegulikni iste'mol qilishmaydi. Olingan aminokislotlar qonga tushadi, quvvat va to‘yish hissi paydo bo‘ladi.

Ayollar uchun

Tarkibida protein, kalsiy va D vitamini yetarli darajada bo‘lgan tvorog gormonal fonni barqaror ko‘rinishda ushlab turadi. Turli tadqiqotlar tvorog iste'mol qilinganida ko‘krak bezi saratoni xavfi kamayishini ko‘rsatgan. Tishlar va suyaklar mustahkamlanadi, chunki kalsiyning kunlik normasi 28 foizini aynan tvorogdan olish mumkin.

Foto: Pixabay

Qondagi qand miqdori

Ikkinchi turdagi diabetda tvorogni doimiy ratsionga kiritish tavsiya etiladi. U qondagi qand miqdori darajasini normaga keltirishda yordam beradi. Biroq bunda mahsulotning yog‘lilik darajasi 1,5 foizdan ortiq bo‘lmasligi lozim, aks holda organizmga zarar keltirishi mumkin.

Yurak va tomirlar

Tvorog tarkibida yetarli miqdorda magniy bo‘lib, u yurak qon—tomir tizimiga ijobiy ta'sir qiladi. Tvorog arterial qon bosimini nazorat ostida ushlab, tromblar xosil bo‘lishiga qarshi kurashadi deyish mumkin. Biroq buning uchun kuniga 200 grammga yaqin tvorog iste'mol qilish lozim.

Kasalliklar

Organizmda barcha tizimlar yaxshi ishlasa va almashinuv jarayonlari, jumladan ovqatlanish bilan qo‘llab-quvatlansa, insultning yuzaga kelish xavfi minimum darajada bo‘ladi. Tvorog va sut mahsulotlarini yetarli miqdorda iste'mol qilish insult oldini oluvchi foydali odatlarga kiradi. Shuningdek, diabet, metabolik sindrom va yurak qon-tomir tizimidagi buzilishlar kabi boshqa kasalliklarning ham. Demak, tvorogning organizmga zarar yetkazish ehtimoli juda oz. Muhimi, qarshi ko‘rsatmalar va tvorogning ayrim o‘ziga xosliklarini yodda saqlash. Masalan, uning tarkibida tuz miqdori ko‘p bo‘ladi. Shunday ekan, buyrak kasalliklaridan aziyat cheksangiz, uni iste'mol qilishni aksincha cheklash lozim.

Teglar