Havoni tozalaydigan bino

  • 09:50 / 24.11.2016
  • 9239

Agar siz atrof-muhitning tozaligi haqida qayg‘urishni muhim deb hisoblasangiz, italiyaliklarning yangi ixtirosi sizni befarq qoldirmaydi. Ular havoni avtomatik ravishda tozalovchi ekologik materiallardan iborat bino loyihasini ishlab chiqishdi. New Atlas nashri ushbu ekologik mo‘jiza haqidagi yangilik bilan bo‘lishdi. 

Yangi bino Milanda joylashgan bo‘lib, unga Palazzo Italia nomi berilgan. U asosiy vazifasi havoni tutun, chang va zararli birikmalardan tozalash bo‘lgan maxsus materialli panellar bilan qoplangan.

Italiyaliklar bunday natijaga erishishda dioksid titan va oddiy sementning maxsus birikmasidan foydalanishdi. Bunday tarkib panellar orasidan o‘tayotgan havoni tozalab, undagi azot zarralarini ushlab qolishga qodir.

Bu hali hammasi emas: yoqimsiz birikmalar nafaqat havodan yo‘q qilinadi, balki keyinchalik yomg‘ir paytida yuvilib ketadigan xavfsiz moddalarga (inert tuzlarga) aylantiriladi. 

Bu ekologik binoning yagona xususiyati emas. U 40 foizga kam energiya sarflaydi. Bino tomi uni elektr energiyasi bilan ta'minlovchi quyosh batareyali panellar bilan qoplangan. 

Italiyalik olimlarning ishonch bilan ta'kidlashlaricha, hech bo‘lmaganda 15 foiz binolar ana shunday ekologik materialdan qurilganda edi, bu havodagi iflosliklarni ikki barobar kamaytirish imkonini berardi. 

Teglar