Иситиш тизимисиз одамлар қишда қандай исийди?

Биласизми? 19-11-2014

Маълум бўлишича, Европа ва Осиёнинг айрим давлатларида марказий иситиш тизими йўқ, бироқ маҳаллий аҳоли қишда ҳам унчалик совуқ қотмайди.

Буюк Британия

1. Ҳар бир британиялик ўзини ўзи иситиши керак. Мамлакатда марказий иситиш тизими йўқ. Уйлар ва квартираларда бойлерлар — сув ва батареяларни иситадиган газ устунлари ўрнатилган. Уй эгасининг хоҳишига қараб батареяни яхшилаб қиздириш ёки иситишдан пул тежаб, музлаб ўтириш мумкин.

2. Ҳожатхона ва ваннахоналарда, одатда, батареялар йўқ, қишда уларда ҳарорат 10 даражадан ошади. Ётоқхонани ҳам иситишмайди — британлар, одатда, иссиқ кўрпа тагида пижамада ухлашади. Кечаси билан иситиш қиммматга тушади. Бойлерда таймер ўрнатилган, ҳар бир соат 15 дақиқадан 4 қисмга бўлинган. Эрталаб уйғонадиган вақтга бойлерни иситишга мослаб қўйишади. Ишга кетгандан кейин эса ўчади.  

3. Британияда иситиш бир суткада фақат бир неча соат амалга оширилади, бу жуда арзон ва экологик жиҳатдан фойдали. Британ физиологларининг айтишича, 21 даражадан юқори иссиқлик ноқулайлик туғдиради, 24 даражадан юқориси эса юрак хуружлари хавфини оширади. Газ ва электр етказиб берадиган компаниялар қишда совуқ қотмаслик бўйича маслаҳатлар беришади. Маслаҳатлардан бири — мушук боқиш. Чунки мушукча иссиқ бўлади, электр қувватини талаб қилмайди.

4. Бирлашган Қиролликнинг камхарж оилалари ҳам бир амаллашади. Баъзилар маҳаллий кутубхонага исиниш учун беради. Кутубхона шинам, интернет текин. 

5. Аҳолига пулни иқтисод қилиш ҳақида маслаҳатлар берилади. Масалан, кир ювадиган машинани тўлдирмай ишлатмаслик керак — кирлар йиғилишини кутиш лозим. Совуқ сувда ювиш тавсия этилади. Бу кийимлар учун иссиқ сувдан кўра фойдалироқ. Ишламаётганда компьютерни ўчириш лозим. Мобил телефонни кечаси билан қувватлантиришга қолдирмаслик, электрни тежайдиган лампочкалардан фойдаланиш, узоқ чўмилмаслик керак.  

Япония

6. Марказий иситиш тизими фақат Хоккайдо префектураси — мамлакатнинг энг совуқ қисмида бор. Япониянинг қолган аҳолиси мустақил исиниши керак.

7. Япониядаги замонавий уйларнинг аксарияти электр кондиционерлар (қиш/ёз) ва турли хил (электр, мойли, керосин ёки газли) иситиш қурилмалари воситасида иситилади. Йилнинг совуқ пайтида японлар иссиқни яхши ушлайдиган махсус толали иссиқ пижама кийишади ёки оддий кўрпа устидан электр кўрпа ёпишади. 

8. Японияда электр гиламлар кенг оммалашган. Бундай гилам электр кўрпага ўхшайди. Фойдаланувчи иситиш ҳароратини ўзгартириши мумкин. Гиламнинг фақат бир қисми, масалан, ўтирган жойингизни иситсангиз ҳам бўлади. 

9. Японлар иситиш учун котацудан ҳам фойдаланишади. У ҳар бир япон уйида бор. Замонавий котацу қопқоқ остига жойлаштирилган иситиш қурилмаси бор стол кўринишида бўлади. Котацу қадимий Японияда ҳам мавжуд эди, фақат кўриниши бироз бошқачароқ бўлган. 

10. Анъанага кўра, котацу атрофида бутун оила фақат овқатланиш учун эмас, балки, суҳбат қуриш, столда ўйин ўйнаш, телевизор кўриш учун ҳам тўпланади. Котацу бутун оилани бирлаштириб, оилавий бирдамликка ва илиқ муносабатларга ундайди. Умумий кўрпа остига йиғилган болалар бошқаларга ҳам ғамхўрлик қилишни ўрганишади. 

11. Дарвоқе, япон мактабларида иситиш тизими йўқ. Танаффусда болалар қўлларини иситиши мумкин бўлган муайян жойда иситиш қурилмалари бор, холос.  

Германия

12. Германияда ҳам марказий иситиш тизими мавжуд эмас. Бу ерда ҳам ҳамма ўзини ўзи иситади. Хусусий уйларда ўз иситиш тизимлари, кўп қаватли уйларда — батареялар учун сувни иситадиган алоҳида газ ускуналари бор. Ким қанча газ ишлатса, шунча пул тўлайди. 

13. Ҳамма батареяларда термостатли вентиллар бўлиб, хонадаги ҳароратни бошқаради. Оила кўп ўтирадиган меҳмонхонага кўпроқ иссиқлик берилади, ҳожатхонада эса — жуда кам. 

14. Кечқурун немислар кўпинча электр чойшаблардан фойдаланишади — бу бутун танани иситади. У автомат тарзда ёқилиб, ўчади.

15. Германияда уй эгалари хусусий уйларни иситиш учун биомасса, ўтин, ёғочнинг қайта ишланишидан қолган пеллетлар, иситиш насослари ва қуёш батареяларидан тобора кўпроқ фойдаланишмоқда. Давлат бу йўналишни қонун билан ҳам, моддий томондан ҳам қувватламоқда. Германияда яқинда қабул қилинган қонунга кўра, фойдаланишга топшириладиган янги биноларнинг бир қисми ишлатиладиган қувватни қайта тикланадиган манбалардан олиниши шарт. 

Франция

16. Францияда марказий иситиш тизими йўқ.

Бунинг ўрнига икки хил иситиш усули мавжуд:

1. Уйни умумий иситиш — бу алоҳида олинган кўп қаватли уйдаги марказлашган иситиш тизими. У уй раҳбарияти томонидан ёқилади. Бундай уйлардаги квартиралар иситиш ускуналари мавжуд эмас. 

2. Хусусий иситиш тизими. Ваннахона, ҳожатхона ва ошхонада иссиқ сувни тартибга солиб турадиган аппарат бор. У электр ёки газли бўлади. 

17. Батареялар ана шу аппаратга уланган. Квартирадаги иссиқлик ўзгартириб турилади. Электр иситиш ускуналари газли ускуналардан кўпроқ тарқалган. Уларнинг асосий афзаллиги: газ ускуналар сингари мунтазам ва қиммат текширувга муҳтож эмас. Фойдаланганда электр қуввати учун пул тўланади. 

18. Ўз уйини (эскими ёки янгими) иситиш ишларини амалга оширадиган ҳамма французлар сарфлаган пулларини солиқ декларациясига киритишга ҳақли. Шунда иш ҳақининг 25дан 50%ига айириб ташланиб, даромад солиғини камайтириши мумкин. 

Электрни тежайдиган ҳар қандай ускунани ўрнатганда ҳам шундай йўл тутилади. Уларни сотиб олиш учун фуқаролар имтиёзли кредитлар олишади. 

Финляндия

19. Финляндияда уйлар қувватни ердан олиши кенг тарқалиб бормоқда. Ахир Финляндия шароитида 200 метр чуқурликда ҳарорат +10 даражага етиши мумкин. Фин қоялари — улкан радиоатордек: ёзда иссиқликни тўплаб, қишда улашади.

20. Фин уйларида махсус қурилма ўрнатилади: иссиқлик насоси. У қиммат туради, албатта, лекин 5-7 йилда пули чиқиб кетади ва электр қувватини 30%, ҳатто ундан ҳам кўпроқ тежашга имкон беради. Табиийки, бундай рақам эски уйларнинг эгаларини ҳам янги ускуналарни ўрнатишга ундайди.   

21. Финлар ҳатто ҳаводан ҳам самарали фойдаланишади — тескари қўйилган совуткични тасаввур қилинг: унинг совуқ қисми кўчада, иситиш тизими эса ичкарида. -25˚ совуқда бу усул яхши самара беради: иссиқлик насоси 1 кВт сарфлаб, 2, ҳатто 5 кВт иссиқлик чиқаради.

22. Бундай “иссиқ” совуткич, аниқроғи, кондиционер кичкина уйларга мос — турар жой майдони 120 метрдан ошмайдиган. Кичик уйлар учун бу ҳақиқий топилма: ерни бурғилаш ва қиммат ускуна ўрнатишнинг кераги йўқ.



МАҚОЛА МАНЗУР КЕЛГАН БЎЛСА ДЎСТЛАРИНГИЗ БИЛАН ҲАМ БЎЛИШИНГ

МАЗКУР БЎЛИМДАН ЭНГ СЎНГГИ МАҚОЛАЛАР



Изоҳлар

Изоҳингиз учун раҳмат. Тез орада сайт маъмурияти уни кўриб чиқиб, чоп этади.
Изоҳ ёзиш

Биринчилардан бўлиб изоҳ қолдиринг!

Биз сизга дунёнинг гўзаллигини эслатиб турамиз. Ишдан, мактабдан ва кўчадаги бошқа юмушлардан ҳориб уйга қайтганингизда, сизни ҳаётнинг оддий ва одатий ташвишларидан бироз чалғита олсак, ютуғизмиз шудир бизнинг.
Яндекс.Метрика

© 2018 XABARDOR.UZ