“Янги Ўзбекистоннинг 2022–2026 йилларга мўлжалланган тараққиёт стратегияси тўғрисида”ги Президент фармони лойиҳасида, жумладан, маҳаллий давлат ҳокимияти органлари фаолиятининг институционал асосларини замон талабларига мослаштириш масаласи ҳам кўтарилган.

Унга кўра, мазкур муддат оралиғида маҳаллий ижро ҳокимияти органлари демократик тамойиллар асосида шакллантирилади, шу жумладан ҳокимларни сайлаш тизимини жорий этишнинг ҳуқуқий асослари яратилади.

Жойлардаги масалаларни ҳал этишда маҳаллий ҳокимликларнинг молиявий имкониятлари янада кенгайтирилади ва ҳар бир вазифа
ижроси, шунингдек, сарфланаётган маблағлар юзасидан уларнинг жамоатчилик олдидаги ҳисобдорлиги оширилади.

Маҳаллий давлат ҳокимияти органлари томонидан ҳудудий ижро органларининг штат бирлиги ва тузилмаларини белгилаш амалиёти босқичма-босқич кенгайтирилади, ҳудудларда амалга ошириладиган вазифалар бўйича “ваколатлар реестри” шакллантирилади.

Шунингдек, маҳаллий бошқарув фаолиятига ахборот-технологияларни кенг жорий қилиш, ҳудудларнинг 40 дан ортиқ, жумладан транспорт, инфратузилма, ижтимоий ва бошқа соҳалар бўйича маълумотларни жамловчи таҳлилий геопорталларини ишга тушириш ҳам кўзда тутилмода.

• Фарғона
• Лойиҳа
• ҳоким