Бош прокуратура ходими Самир Раҳмоновнинг 2021 йил 26 мартда иш вақтида иш жойида вафот этгани бўйича Бандлик ва меҳнат муносабатлари вазирлигининг Давлат меҳнат инспекцияси томонидан изоҳ берилди.

Вазирлик Матбуот хизматининг таъкидлашича, иш жойида вафот этишга оид масалалар Ҳукуматнинг 286-сонли қарори билан тасдиқланган Низомга мувофиқ амалга оширилади.

Унга кўра, ташкилот ҳудудида ва унинг ташқарисида ходимнинг меҳнат вазифаларини бажараётганда юз берган жароҳатланиши ёки саломатликнинг бошқа хил шикастланиши меҳнат фаолияти билан боғлиқ равишда содир бўлган бахтсиз ҳодисалар ҳисобланади.

Шунингдек, табиий ўлим, ўзини ўзи ўлдириш, жабрланувчининг ўз саломатлигига қасддан шикаст етказиши, жабрланувчининг жиноят содир қилиш чоғида шикастланиши ҳолатлари (суд-тиббий экспертиза хулосаси ёки тергов органларининг маълумотларига кўра) текширилмаслиги ва ҳисобга олинмаслиги белгиланган.

Давлат меҳнат инспекцияси мазкур Низомга мувофиқ оқибати ўлим билан тугаган ҳодиса тўғрисида иш берувчининг мажбуриятлари қандай бўлиши кераклигини ҳам маълум қилган.

Унга кўра, бундай ҳолларда иш берувчи:

• Бандлик ва меҳнат муносабатлари вазирлигига, Тошкент шаҳар Бандлик бош бошқармасига;

• бахтсиз ҳодиса юз берган жойдаги ҳудудий ички ишлар органига;

• иш берувчининг фуқаролик жавобгарлигини мажбурий суғурта қилиш шартномаси бўйича суғурталовчига дарҳол хабар бериши керак.

“Тиббий хулосага асосан Бандлик ва меҳнат муносабатлари ва вазирлигига, Тошкент шаҳар Бандлик бош бошқармасига мазкур ҳолат бўйича хабар берилмаган.

Тошкент шаҳар суди матбуот хизмати марҳумнинг отаси судга мурожаат қилганлигини маълум қилган. Суднинг 17 сентябрдаги ҳал қилув қарори билан даъвогар А.Рахмановнинг даъвоси рад қилинган”, – дейилади инспекция хабарида.

Шунингдек, Давлат меҳнат инспекцияси суд қароридан кейин Инспекция ваколатига кирадиган масалалар юзасидан қўшимча хулосалар, тушунчалар берилмаслигини баён қилган.

Эслатиб ўтамиз, бир муддат олдин собиқ прокуратура ходими Самир Раҳмоновнинг отаси Бош прокуратурани ўғлининг ўлими учун товон тўламаётганликда айблаб судга бергани айтилган эди.

Самир Раҳмонов жорий йил 26 апрел куни иш жойида вафот этган.

• Бош прокуратура
• Прокуратура