Uzbekistan Airports матбуот хизмати 3 декабрь куни Урганч ва Нукус аэропортларида кўриш имконияти ёмонлашгани сабабли самолётлар учиш ва қўнишни амалга ошира олмаганини маълум қилди.

Натижада Урганч аэропортидаги кучли туман туфайли “Аэрофлот”нинг Москвадан парвоз қилаётган AFL1976 рейси соат 03:25 да “Шереметьево”дан учишни амалга оширмаган.

Шунингдек, яна икки авиақатнов билан ҳам юқоридаги каби ҳолат кузатилган:

– С7 Airlines авиакомпаниясининг Самара-Урганч йўналиши бўйича соат 04:35 да учиши керак бўлган SBI6481 рейси;

– “Урал” авиакомпаниясининг Санкт-Петербургдан соат 03:30 да учиши керак бўлган SVR2473 рейси.

Маълум қилинишича, айни вақтда самолётлар Урганчдаги об-ҳаво шароитлари яхшилангунга қадар жўнатувчи-аэропортларда қолмоқда.

Кўриш масофаси 200 метргача қисқарган кучли туман, шунингдек, Нукус аэропорти фаолиятини ҳам чеклаб қўйган. Uzbekistan Airways’нинг икки рейси Тошкентга парвозини кутмоқда. Бундан ташқари, соат 11:30 да Нукус-Ақтау йўналиши бўйича учиши кутилаётган рейс ҳам кечиктирилиши мумкин.

Uzbekistan Airways бу ҳақда маълумот бериб, ҳар икки шаҳар аэропортларида кузатилаётган қуюқ туман сабабли аввал режалаштирилган HY-051/052, 053/054, 011/012 рейслари вазият ўзгармагунига қадар қолдирилишини маълум қилди. Учиш вақти эса тахминан 14:00 га режалаштирилган.

“2 ва 3-январ куни кечиктирилган ёки қолдирилган авиақатновлар йўловчилари авиачипта пулини қайтариш ёки бепул бошқа санага ўзгартириш имкониятига эгалар. Бунинг учун авиачипта харид қилинган жойга мурожаат қилишлари керак”, – дейилади Uzbekistan Airways хабарида.

• Нукус
• Urganch
• Uzbekistan airways