2022-2026 йилларда чорвачилик озуқа базасини кенгайтириш ва ишлаб чиқариш ҳажми 1,5-2 баробарга кўпайтирилади.

“Янги Ўзбекистоннинг 2022–2026 йилларга мўлжалланган тараққиёт стратегияси тўғрисида”ги Президент фармони лойиҳасига кўра, жорий йил январ ойида чорвачилик озуқа базаси мустаҳкамлашга оид норматив ҳуқуқий-ҳужжат қабул қилинади.

Унга кўра, давлат бюджети ҳисобидан қуйидагилар:

– Чорва озуқа майдонини 722 минг гектарга етказиш;

– иқтисодий самарасиз, паст ҳосилли пахта-ғалла майдонларида ҳар йили алмашлаб экиш тизими орқали 50 минг гектарга беда экинларини экиш;

– Қорақалпоғистон Республикаси Бўзатов, Нукус, Тахиатош, Тахтакўпир, Қораўзак ва Қўнғирот туманларида 30 минг гектар пахта ва ғалла майдонлари тўлиқ озуқабоп экинлар етиштириш учун ажратиш;

– ғалладан бўшаган 135 минг гектар такрорий майдонларда 450 та паррандачилик корхоналари томонидан озуқа (маккажўхори ва кунгабоқар) экинлари етиштиришни ташкил этиш;

– фойдаланишдан чиққан 20 минг гектарни оборотга киритиш ва озуқа экинларини жойлаштириш;

– озуқабоп экинларнинг серҳосил навларини кўпайтириш, йил давомида
2-3 марта ҳосил олиш ва ҳосилдорликни 1,2 баробарга ошириш;

– 58 та ем ишлаб чиқариш корхоналари қувватини йиллик 485 минг тоннага етказиш;

– Чорвачилик ва паррандачилик илмий-тадқиқот институти қошида Чорвачилик озуқа экинлари марказини ташкил этиш ва унга озуқабоп экинлар суперэлита ва элита уруғларини етиштириш ҳамда тажрибадан ўтказиш учун Тошкент вилоятида 50 гектар ер майдонини ажратиш ишлари амалга оширилади.

Шунингдек, яйловлардан самарали фойдаланиш, қайта тиклаш ва ҳосилдорликни ошириш мақсадида 2022 йилда 2,2 млн гектар яйловларда геоботаник тадқиқотлар амалга оширилади ва яйловларни қайта тиклаш чоралари кўрилади. Бундан ташқари чўл яйлов ўсимликлари уруғчилиги базаси яратилади.

Президент фармони лойиҳасида кўзда тутилаётган юқоридаги тадбирлар назорати Бош вазир ўринбосари Ш. Ғаниевга юклатилмоқда.

• Чорвачилик
• Лойиҳа