Ижтимоий тармоқларда жорий йилнинг 31 декабр куни фойдаланишга топширилган Самарқанд шаҳридаги ер ости йўли деворларидан кучли ёмғир оқибатида кўп миқдорда сув сизиб кираётгани акс этган видеотасвир тарқалмоқда.

Шаҳар ҳокимияти Матбуот хизмати маълумотларига кўра, Ибн Сино ва Рудакий кўчалари чорраҳасида бунёд этилган ер ости ўтиш йўли учун 143 миллиард сўм сарфланган.

Таъкидлаш жоизки, шаҳар йўл инфратузилмасини яхшилаш, аҳоли ва сайёҳлар учун қулайлик яратиш, транспорт қатнови хавфсизлиги ва барқарорлигини таъминлаш мақсадида 143 миллиард сўмлик тоннел – йўл ўтказгич ва Бўстонсарой кўчасининг Сиёб канали устидаги йўл 68 миллиард сўм маблағ ҳисобига реконструкция қилинди.

“Ўзбекистон 24” телеканалининг мазкур тоннел очилиш маросимидан тайёрлаган лавҳасида журналистнинг таъкидлашича, объект 3 йил давомида қуриб битказилиши керак бўлгани ҳолда 1,5 йилда битказилган ва фойдаланишга топширилган.

Мазкур қурилиш объектининг параметрлари қуйидагича:

– йўл ўтказгич узунлиги 1 км;

– баландлиги 5,8 метр;

– кенглиги 26,4 метр;

– ёпиқ қисмининг узунлиги 120 метр.

Гидрометеоролог тадқиқотчи Эркин Абдулаҳатов мазкур мавзуга эътибор қаратиб, буюртмачи ва қурувчилар олдига қатор саволларни қўймоқда.

“Хўш, лойиҳада ҳудудда кузатилган ёғинларни хавфсиз ва талофатсиз ўтказиб юборувчи дренажларни қуришда қандай ёғин миқдори инобатга олинган? Ўзи умуман, қурилиш лойиҳасида табий омил таъсирлари эътиборга олинганми?

Ҳисобга олинган бўлса, нега янги объект деворларидан сув сизиб чиқмоқда? Баҳор-ёзги сел-сув тошқин келтириб чиқарадиган ҳақиқий интенсив ёғинлар даврида нима бўлади?” – деб ёзади у.

Шунингдек, у Самарқанд кузатув метеорологик станцияси фаолияти ҳақида ҳам тўхталиб, қурувчи ташкилотлар нега бу кузатув станцияси маълумотларидан унумли фойдаланмаганини танқид остига олади.

“Самарқанд кузатув метеорологик станцияси ўз иш фаолиятини бошлаганига мана салкам 1 асрдан кўп вақт бўлди. У ўзида ҳудудда кузатилган асрий ёғингарчилик маълумотларини тўплаб, йиғиб ётибди. Маълумотлар шу каби қурилиш объектларини барпо этиш учун тўпланяпти. Нега чуқурроқ таҳлил олиб бориб мукаммал объектлар қурмайсизлар? Сизларга ким, нима ҳалақит беряпти?” – дейди тадқиқотчи.

• Об-ҳаво
• Самарқанд
• қизиқарли