Қозоғистон Президенти Қосим-Жомарт Тоқаев Манғистау вилоятидаги намойишчиларни “масъулиятга ва мулоқотга тайёр бўлишга” чақирди.

Манғистау вилоятининг Жанаозен, Ақтау ва шаҳарлари аҳолиси 2022 йил 2 январдан бошлаб суюлтирилган газ нархи ошишига қарши норозилик билдиришни бошлашган. Улар бир литр газ нархини 120 тенгедан 50 тенгега туширишни талаб қилаётганлиги қайд этилган.

Шунингдек, жорий йил 4 январ куни Ақтауда Интимак майдонида 500 га яқин одам тўпланган. Намойишчилар учун марказий майдонда улкан ўтов тикилган ва унинг ичида иссиқ, чой, нон, сомса бўғирсоқ ва бошқа таомлар тарқатиш ташкил қилинган. Шунингдек, тунда аёллар ва қарияларга адёллар тарқатилган.

“Ақтауда ҳукумат комиссияси иш бошлади, унинг таркибига президент маъмурияти ходимлари кирган. Республика тезкор штаби доимий асосда иш олиб бормоқда. Комиссияга мамлакатимиздаги барқарорлик манфаатларидан келиб чиққан ҳолда юзага келган муаммонинг мақбул ечимини топиш вазифаси топширилди. Ҳуқуқни муҳофаза қилувчи органларга жамоат тартиби бузилмаслигини таъминлаш бўйича кўрсатмалар берилди. Намойишчилар масъулият ва мулоқотга тайёрлигини кўрсатиши керак”, – деб ёзган Қосим-Жомарт Тоқаев ўз саҳифасида.

Хабарда келтирилишича, ҳукумат суюлтирилган газ нархини тартибга солиш бўйича комиссия тузиб, нарх аллақачон 120 тенгедан 85-90 тенгега туширилганини маълум қилган. Шунингдек, рақобатни ҳимоя қилиш ва ривожлантириш агентлиги Манғистау вилоятидаги эҳтимолий нарх келишуви бўйича ёқилғи қуйиш шохобчалари эгаларига нисбатан текширув ўтказишни бошлаган.

Тадбиркорлар томонидан нархларни асоссиз ошириб юбориш ҳолатлари аниқланган тақдирда Рақобатни ҳимоя қилиш агентлиги томонидан маъмурий чоралар кўрилади, дейилади хабарда.

• Газ
• Қозоғистон