Бухородаги Ситораи Моҳи Хоса тарихий мажмуасида олиб борилган ишларнинг аҳволи ўрганилганида мажмуада реставрация ишлари нотўғри олиб борилгани оқибатида унинг бадиий безаклари, нақшлари, кошинлари нобуд қилиниб, тарихий ва бадиий қийматига жами 28 млрд сўмлик зарар етказилгани аниқланган.

Бу ҳақда Сенатнинг йигирма учинчи ялпи мажлисида маълум қилинди.

Қайд этилишича, бундан ташқари Бухоро, Қашқадарё вилоятлари ҳамда Тошкент шаҳридаги моддий-маданий мерос обектларига жуда катта миқдорда зарар етказилган, давлат муҳофазасига олинган айрим археологик обектлар эса йўқ бўлиб кетган.

Ялпи мажлисда мавжуд муаммоларнинг қонуний ечимини белгилаш учун “Моддий маданий мерос обектларини муҳофаза қилиш кучайтирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Қонун сенаторлар томонидан муҳокама қилинди ва маъқулланди.

• Бухоро
• Сенат
• Тарих
• хабар