Ўзбекистонда рамазон ойида эҳтиёжманд аҳолини қўшимча қўллаб-қувватлаш мақсадида 1 миллион сўм ва 500 минг сўмдан ёрдам пуллари берилиши хабар қилинганди. Бундай хабарлардан сўнг фирибгарлар турли йўллар билан фуқаролар пулларини қўлга киритиши мумкинлиги сабабли фуқаролар огоҳ бўлишга чақирилди.

Президент қарорига кўра, 2026 йил 1 мартга қадар 1 миллион сўмдан бир марталик моддий ёрдам ижтимоий реестрда давлат таъминотида турган 215 мингта оилага, шунингдек, ёлғиз яшовчи кексалар ва ногиронлиги бўлган 13 минг нафар шахсга берилади. Бундан ташқари, камбағал тоифадаги 421 мингта оилага 500 минг сўмдан ажратилиши кўзда тутилган. Ягона интерактив давлат хизматлари портали бунинг учун фуқаролардан ҳеч қандай ариза шарт эмаслигини, пул маблағлари 1 мартга қадар фуқаронинг ижтимоий картаси ёки пластик картасига автоматик тушишини билдирди.

Фирибгарларга алданмаслик учун қуйидагиларга риоя қилиш сўралди:

“Агар сизга пулни олиш учун ариза беринг” дейишса — бу ёлғон! SMS кодни берманг.

Банкдан ёки 5500 хизматидан келган махфий кодни ҳеч кимга (ҳатто ўзини банк ходими ёки маҳалла раиси деб таништирса ҳам) айтманг.

Шубҳали ҳаволаларга кирманг. “Тўловни қабул қилиб олинг” деган мазмундаги Telegram ботлар ёки расмийга ўхшаш сохта сайтларга карта маълумотларини киритманг.

“Агар сиздан пул тушириб бериш учун код сўрашса ёки қайсидир сайтга карта рақамингизни ёзишни талаб қилишса, билингки — қаршингизда фирибгар турибди. Давлат ташкилотлари сизга ҳеч қачон “пулингизни олиш учун ҳаволага киринг” деб SMS юбормайди. Рамазон ойи хонадонингизга барака олиб келсин! Омонатларингизга эҳтиёт бўлинг”,  –дейилади хабарда. Шахс ижтимоий реестрга киритилган оила аъзосими ёки йўқлигини расмий мй.гов.уз портали орқали бепул текшириши мумкин.​

• Фирибгарлик
• Моддий ёрдам
• Ogohlantirish
• Ramazon