Дунё ахборот агентлиги хабарига кўра, Ўзбекистон дипломатлари Васлав Гавел номидаги Прага халқаро аэропортининг йўналишларни ривожлантириш бўйича менежери Мартин Татек билан онлайн учрашув ўтказди.

Музокараларда сайёҳлар ва ишбилармонлар оқимини ошириш, авиация соҳасидаги ҳамкорликни кенгайтириш масалалари муҳокама қилинди. Чехия фуқаролари учун визасиз режим жорий этилгани, шунингдек, Ўзбекистон фуқароларига туристик визалар бериш жараёни ижобий динамика кўрсатаётгани қайд этилди.

Мартин Татек Ўзбекистоннинг маданий-тарихий туризм салоҳияти чехиялик сайёҳлар учун жозибадор эканини таъкидлади. Унинг сўзларига кўра, мамлакатимизнинг бой маданий мероси, тарихий обидалари ва яратилган қулай шароитлар сайёҳларда катта таассурот уйғотмоқда. Шунингдек, Ўзбекистон Чехия ишбилармон доиралари учун истиқболли йўналиш сифатида баҳоланаётгани билдирилди.

Томонлар тўғридан-тўғри мунтазам авиақатновларни йўлга қўйиш туризм ва бизнес алоқаларини ривожлантиришда муҳим омил бўлишини таъкидлади. Ҳозирда йўловчиларнинг аксарияти транзит рейслардан, асосан Истанбул орқали фойдаланаётгани, бу эса йўналиш рақобатбардошлигига таъсир қилаётгани айтилди. Прага–Тошкент ўртасида тўғридан-тўғри рейсларнинг йўлга қўйилиши туроператорлар ва индивидуал сайёҳлар учун сафарларни олдиндан режалаштириш, турпакетлар шакллантириш ҳамда маркетинг ишларини самарали олиб бориш имконини беради.

Чехия томони “Uzbekistan Airways”ни асосий салоҳиятли ҳамкор сифатида қайд этди. Парвозларни йўлга қўйиш масаласини муҳокама қилиш учун март ойи бошида Прага аэропорти, миллий авиакомпания ҳамда манфаатдор хусусий ташувчилар иштирокида қўшимча онлайн учрашув ўтказиш режалаштирилган. Унда мунтазам қатновларни ташкил этиш шартлари ва рағбатлантириш механизмлари кўриб чиқилади.

• Авиақатнов
• Chexiya
• Музокара
• Тошкент