АҚШ Президенти Дональд Трамп Буюк Британияда Амур йўлбарси ҳужумига учраб ҳалок бўлган 23 ёшли Уильям Чепмен билан боғлиқ видеоларни ижтимоий тармоқда эълон қилди. Унинг постлари марҳумнинг яқинлари норозилигига сабаб бўлди. Бу ҳақда “Daily Mail” ва “The Guardian” нашрлари хабар берди.

Фожиа 10 октябрь куни Донкастер шаҳри яқинидаги “Yorkshire Wildlife Park” табиат боғида юз берган. Маълумотларга кўра, Уильям Чепмен Олтой лақабли Амур йўлбарси сақланадиган волерга ўзи кириб кетган. Гувоҳлар уни тўхтатишга уринган, бироқ йигит тахминан тўрт метр баландликдан ҳайвон сақланадиган ҳудудга сакраган. Йўлбарс унга ҳужум қилган. Тиббиёт ходимлари етиб келганига қарамай, йигит олган жароҳатлари оқибатида вафот этган.

Ҳодисадан сўнг боққа ташриф буюрганлар эвакуация қилинган, муассаса эса вақтинча ёпилган. Полиция воқеа юзасидан текширув олиб бориб, ҳужум акс этган видеоларни тарқатмасликка чақирган. Боғ маъмурияти Олтой лақабли йўлбарс жароҳатланмаганини ва уни ўлдириш режалаштирилмаётганини билдирган.

Воқеадан уч кун ўтиб, 13 октябрь куни Трамп ўзининг Truth Social саҳифасида ҳужум акс этган кадрларни жойлаштириб, “Табиат билан асло ўйнашманг!” деб ёзган. Кейинроқ у сунъий интеллект ёрдамида яратилган, ўзи йўлбарс билан ўйнаётгани тасвирланган видеони ҳам эълон қилган.

Марҳумнинг яқинлари бу материаллар тарқатилишидан норозилигини билдирган. Улар бундай контент ўзларига оғир ботаётганини айтиб, уни тарқатишни тўхтатишга чақирган.

Оила аъзоларининг маълум қилишича, Уильям Чепмен узоқ вақт давомида руҳий касаллик сабабли даволанган ва кучли таъсир қилувчи дори воситаларини қабул қилган. “The Guardian” хабарига кўра, воқеадан кейин табиат боғи ёпиқ қолган, йўлбарсни эса ўлдириш режалаштирилмаган.