Ўзбекистоннинг миллий ҳайдовчилик гувоҳномаларини Германияда тўғридан-тўғри тан олиш имконияти муҳокама қилинди. Миграция агентлиги Германиянинг Global Talent Alliance ва TSK Logistic компаниялари вакиллари билан транспорт-логистика соҳасида ҳамкорлик масалаларини кўриб чиқди.

Агентлик раҳбари ўринбосари Элёр Тоштемиров иштирокидаги учрашувда Ўзбекистон фуқароларини Германияда ишга жойлаштириш ва уларни ушбу мамлакат стандартлари асосида тайёрлаш масалалари муҳокама қилинди. Миллий ҳайдовчилик гувоҳномаларини Германияда тан олиш бўйича ваколатли идоралар билан келишиш таклифи ҳам илгари сурилди.

Шунингдек, Германиядаги иш берувчилар талабларига мос равишда автобус ва юк автомобили ҳайдовчиларини тайёрлайдиган қўшма Германия–Ўзбекистон ҳайдовчилик мактабини ташкил этиш ташаббуси кўриб чиқилди.

Учрашувда номзодларнинг Германияда ишлаш учун виза расмийлаштириш жараёнида дуч келаётган муаммолари ҳам муҳокама қилинди. Якунда Миграция агентлиги ва Global Talent Alliance ўртасида ҳамкорлик шартномаси имзоланди.

Ҳозирча Ўзбекистон ҳайдовчилик гувоҳномаларини Германияда тўғридан-тўғри тан олиш бўйича якуний келишувга эришилгани ҳақида маълумот берилмаган. Ташаббуснинг амалга оширилиши тегишли музокаралар ва ваколатли идоралар билан келишувларга боғлиқ.