Қозоғистондаги тартибсизликлар вақтида 14 нафар ўзбекистонлик қўлга олинган ва улар тергов изоляторида сақланмоқда. Бу ҳақда Қозоғистон Омбудсмани Элвира Азимова маълум қилди.

“Оммавий тартибсизликлар сабаб ҳибсга олинганлар орасида тергов изоляторларида 18 нафар хориж фуқароси сақланмоқда. Уларнинг 14 нафари – Ўзбекистон, икки нафари – Россия, қолган икки нафари эса Қирғизистон фуқароси”, – деган Элвира Азимова “Хабар” телеканалига берган интервьюсида.

Азимова ҳибсга олинган фуқаролар сақланаётган ёпиқ муассасаларда ўтказилган мониторинг натижаларини ҳам маълум қилди.

Унинг айтишича, ҳибсхоналарда 6 январдан кейин дастлабки 48 соат ичида ичимлик суви ва озиқ-овқат таъминотида айрим камчиликлар бўлган. Бу ўша пайтда вақтинчалик сақлаш ҳибсхоналари ва қўшимча биноларда ҳибсга олинганлар сонининг ортиб кетиши билан боғлиқ бўлган. 10 январдан кейин эса маҳбусларга жўнатмалар қабул қилишга рухсат берилган. Айни пайтда озиқ-овқат таъминотида камчиликлар йўқ”, – дейди Омбудсман.

Эслатиб ўтамиз, аввалроқ Азимова январ воқеаларида ҳибсга олинганлар орасида Тожикистон ва Хитой фуқаролари ҳам борлигини маълум қилган эди.

• Намойиш
• Ўзбекистон
• Қозоғистон