Ижтимоий тармоқларда вилоят ҳокими Шуҳрат Абдураҳмоновнинг топшириғи экани айтилиб, вилоятда “Андижон полкаси” ойлиги эълон қилингани таъкидланган хабарнома сурати тарқалмоқда.

Унга кўра, “Андижон полкаси” куйи яратилганлигининг 100 йиллиги ҳамда шу номдаги халқ рақс ансамбли ташкил этилганлигининг 65 йиллиги муносабати билан жорий йил 25 апрелдан эътиборан барча ташкилотлар, хусусан, “ўзини ҳақиқий андижонликман деб билганлар” ҳар куни Андижон полкаси рақсига тушишни одат тусига киритишлари бўйича вилоятда “Андижон полкаси” ойлиги эълон қилинган.

Шунингдек, бу борада челенжлар ва флешмоблар ташкил қилиш орқали ҳам Андижон полкасини оммалаштириш зарурлиги белгиланган.

Ташкилот ва идоралар раҳбарлари юқорида белгилаб берилган тадбирлар натижаси ҳақида ҳар жума куни соат 15:00 га қадар вилоят ҳокимлиги туризм котибиятига фотоальбомни илова қилган ҳолатда ҳисобот топширадилар.

Мазкур топшириқнинг ижроси юзасидан Қўрғонтепа тумани ҳокимлиги аллақачон иш бошлаган. Ҳокимлик ахборот хизмати тумандаги Тиббиёт техникуми, Педагогика коллежи талабалари ҳамда 1-сон касб-ҳунар мактабининг ўқувчиларининг Андижон полкасига рақс тушаётгани акс этган видеоларни эълон қилди.

• Андижон
• Андижон полькаси
• Шуҳрат Абдураҳмонов