Жорий йилнинг 7-8 май кунлари Сурхондарё вилояти Бойсун туманининг Паданг қишлоғида “Бойсун баҳори” халқаро фольклор фестивали бўлиб ўтди.

Мазкур тадбир Ҳукуматнинг 2022 йил 7 февралдаги қарори билан эндиликда ҳар икки йилда бир марта апрель ойида Бойсун туманида ўтказилади.

Сўнгги йилларда республика бўйлаб халқаро даражадаги турли фестиваллар ташкиллаштирилмоқда. Албатта ташкилий масалалар моддий таъминотсиз, хусусан, бюджет маблағисиз битмайди. Хўш, сурхондарёликларга “Бойсун баҳори” халқаро фольклор фестивали қанчага тушди? Қуйида шу ҳақда.

Таъкидланишича, мазкур тадбир Ўзбек халқининг ўзига хос фольклор санъатини қўллаб-қувватлашни давом эттириш, шу жумладан, халқ достонлари, ҳунармандчилиги, миллий либослари ва халқ ўйинлари, қадимий урф-одатларини сақлаб қолиш ҳамда уларни кенг тарғиб қилиш мақсадида ўтказилади.

Ҳукумат бу борада тегишли қарор қабул қилган ва унга кўра, фестивални ташкил этиш ва ўтказиш тартиби тўғрисидаги низом ҳам тасдиқланган.

Низомга кўра, фестивални ташкил этиш ва ўтказиш билан боғлиқ сарф-харажатларнинг 30 фоизи республика бюджетидан Маданият вазирлигига маданий тадбирлар учун ҳар йили ажратиладиган маблағлар ҳисобидан ҳамда қолган 70 фоизи вилоят ҳокимлиги маҳаллий бюджетининг қўшимча манбалари, жисмоний ва юридик шахсларнинг ҳомийлик хайриялари ҳамда қонунчилик ҳужжатларида тақиқланмаган бошқа манбалар ҳисобидан қопланади.

Бундан ташқари, Бойсун тумани ҳокимлиги туман маҳаллий бюджетининг захира жамғармаси қисми ҳисобидан фестивал иштирокчилари ва меҳмонларини овқатлантириш харажатлари учун 50 миллион сўм ҳамда ётоқ жой билан таминлаш ва хизмат кўрсатиш учун 256 млн 950 минг сўм маблағ ажратган.

Шунингдек, ҳокимлик захира жамғармаси ҳисобидан Қозоғистон ва Қирғизистон Республикаларининг ижодий жамоалари, хорижий ҳакамлар ва қўшиқчиларининг авиа чипталари учун 30 млн сўм, Самарқанд, Бухоро, Қашқадарё ва бошқа вилоятлар меҳмонларини овқатлантириш харажатлари учун  50 млн сўм, 1 та параделтоплан учун 15 млн сўм маблағ ажратган.

6-8 май кунлари туман ИИБ ЙҲХБнинг Бойсун тумани 4H-1613 “Бойсун-Дуоба” автомобиль йўлининг 0-1 километрлари оралиғи, 4H-1607 Инкабод-Паданг автомобиль йўлининг 1-километри (4П-105 автомобиль йўлидан кириш қисми) ҳамда 4К-618 Бойсун айланма автомобиль йўлининг 0-1-километрлари оралиғида транспорт воситалари ҳаракатининг чекланиши маҳаллий бюджетга ҳамда ҳудуддаги аҳоли вакилларининг чўнтакларига қанча зарар келтирганини, афсуски, расмийлаштиришнинг имкони йўқ. 

Шу ўринда қайд этиш керакки, мазкур халқаро тадбирнинг асосий қисми “жисмоний ва юридик шахсларнинг ҳомийлик хайриялари ҳамда қонунчилик ҳужжатларида тақиқланмаган бошқа манбалар” ҳисобидан молиялаштирилиши кўплаб саволларни пайдо қилади. Жумладан, ҳомийларнинг ихтиёрий ташаббускорлиги қай даражада бўлганлиги (айрим иштирокчи ОАВ вакилларининг гувоҳликларига кўра, тадбиркорлар ҳомийлик учун мажбурланган), ҳомийлик асосида йиғилган маблағларнинг сарфланиши ҳақидаги маълумотларнинг шаффофлиги, аcосийси, бу фестивалнинг жами харажатлари ҳақидаги маълумотлар очиқланиши керак.

Маълумот учун, жорий йилги Наврўз байрамлари учун вилоят ҳокимлиги республика бюджетидан ажратилган ссуда маблағлари (30 млрд сўм) ҳисобидан Вилоят Маданият бошқармасига 914,6 млн сўм ажратган. Бундан 175,6 млн сўми Тошкент шаҳрида нишонланган “Наврўз” байрами асосий саҳнасининг фон гуруҳида Сурхондарё вилояти жамоасининг иштирок этиши билан боғлиқ харажатлар учун сарфланган.

Таҳририят

• Байрам
• Бойсун баҳори
• Давлат бюджети
• фестиваль
• Ҳокимлик
• Сурхондарё
• қизиқарли