“Marsel” va Marselo

  • 04:36 / 10.11.2014
  • 2600

O‘tgan mavsum so‘ngiga kelib, jamoaning turnir jadvalidagi o‘rni qoniqarsiz darajaga tushib ketdi va muxlislar rahbariyatga o‘z noroziliklarini o‘ta qo‘pol ko‘rinishlarda ifodalay boshlashdi. Natijada, murabbiy Joze Anigo shoshilinch ravishda iste'foga chiqarilib, Ispaniyada faoliyat ko‘rsatib kelayotgan asli argentinalik mutaxassis Marselo Belsa klubga chaqirildi.

marsello-2

Sobiq murabbiy davrida muxlislar nafaqat yomon natijalardan, balki sifatsiz va zerikarli o‘yin uslubidan ham jahllari chiqqan edi. Shuning uchun, aprel oyida Marselo Marsel ko‘chalarida paydo bo‘lganida, odamlar unga bahor bilan kelgan yaxshi kunlar darakchisiga qaraganday qarab, umid bilan kutib olishadi. U ilk ish kunidanoq jamoani tomoshabop va quvnoq o‘ynashga o‘rgata boshladi.

Lekin, Belsa hali “Marsel” hali bironta rasmiy uchrashuv o‘tkazishga ulgurmasidan, ilk mojoro bo‘lib o‘tdi. Press-konferensiya vaqtida u yig‘ilganlarga klub prezidenti Vensan Labryun transferlar uchun yetarli miqdorda mablag‘ ajratmaganini va istagan o‘yinchisini jamoaga olib kela olmaganidan shikoyat qiladi. “Men o‘ylayapmanki, prezident avval boshdan bajarilmaydigan va'dalar bergan, agar u aldamasdan, bor vaziyatni tushuntirganda ham men buni to‘g‘ri qabul qilgan bo‘lardim” deydi u o‘sha bayonotida. Bunga javoban esa, Labryun murabbiyni ortiqcha qiziqqonlikda ayblab o‘tadi va uning gaplaridan hayronligini bildirib, buni yengiltaklik deya baholaydi. Lekin, prezident murabbiyga qarshi hech bir amaliy chora ko‘rgani yo‘q va ular hamkorlikda ishlashda davom etadilar.

Belsa hamisha o‘zgalardan o‘zgacharoq bo‘lgan. U Argentina terma jamoasida ish boshlaganida, ishni tarkib yetakchisi Xuan Rikelmeni tarkibdan haydash bilan boshlaydi. Bunga izoh sifatida futbolchining yulduzlik kasaliga chalingani va intizomsizligini sabab qilib ko‘rsatadi. “Atletik”dagi faoliyati davomida ham bir-biridan qiziq qarorlar chiqarar ediki, futbol ommasi uning navbatdagi hunarlarini kutib yashardi. U goh allaqachon urfdan qolgan 3-4-3 sxemasini qo‘llar, goh yarim himoyachidan markaziy himoyachi yaratar, goh qanot himoyachisini apornik zonasida o‘ynatib ko‘rar edi. U bir kunda ikkita nazorat uchrashuvini o‘tkazar ediki, futbolchilar kimga dodini aytishni bilmay qolardilar. Hatto bir safar 11 shogirdini klub akademiyasidagi 200 chog‘li tarbiyalanuvchi o‘smirlar jamoasiga qarshi o‘ynashga majbur etadi. U zamonaviy futboldagi inqilobchi. U nostandart yurishlar bo‘yicha tengsiz. Uni jinni deyish ham mumkin, daho deyish ham to‘g‘ri.

marsello-3

Uning Fransiyadagi ishlari ham g‘alati tarzda boshlandi. Avvaliga birinchi turni safarda “Bastiya” bilan o‘yinda 3:1 hisobidagi g‘alaba bilan boshlagan bo‘lsa, ikkinchi turda mahalliy ishqibozlar ko‘z o‘ngida, yangilangan “Velodrom” stadionida o‘tkazilgan ilk o‘yinda “Monpele”ga yutqazildi: nol-u ikki! Muxlislar yana xavotirga tusha boshladilar, lekin bu noxush holat bittagina o‘yin bilan cheklandi.

Keyingi yettita o‘yinda jamoa yettita ketma-ket g‘alabani qayd etdi va to‘plar nisbati ham havas qilarli darajada: 20-3 . Dimitr Payye, Andre Ayyu va Florian Tovenlar o‘tgan mavsumdagi muvaffaqiyatsizlikdan keyin yuqori sport formasini tiklay olishdi, shuningdek, markaziy hujumchi Andre-Per Jinyak deyarli har o‘yinda gol urmoqda.

marsello-4

Bu ko‘rsatkichlar qanchalar qoyilmaqom bo‘lmasin, jamoaning kelgusidagi o‘yinlari ham shunday yorqin o‘tishi haqida ishonch bilan aytishga hali erta. Birinchidan, taqvim ular uchun qulay tuzilgandi, jamoa hali shu paytgacha grandlar bilan duch kelmagan. 21 chi oktyabrdan 22 chi noyabrgacha bo‘lgan tur o‘yinlarida ularni “Lion”, “PSJ” va “Bordo” kabi dahshatli raqiblar kutib turibdi. Agar o‘sha to‘qnashuvlardan omon-eson chiqilsagina, jamoani chempionlik uchun asosiy da'vogar deb hisoblashni boshlasak bo‘ladi.

Va chempionlikni ta'minlaydigan yana bir jihat – Marselo Belsaning qanday kayfiyatda bo‘lishi deyish mumkin. Chunki, uning boss bilan munosabatlari hali mavhumligicha qolmoqda. Marseloning xarakteridan kelib chiqib aytadigan bo‘lsak, u istagan mahal, o‘ziga nisbatan biron nohaqlikni ro‘kach qilib, “to‘rvasini ko‘tarib jo‘nab ketishi” ham mumkin. Uni norozi qilgan yana bir narsa, yozgi transfer oynasi vaqtida rahbarlar uning aralashuvisiz “Botafago”dan braziliyalik himoyachi – Doriyeni 9 mln yevroga sotib olishgan va uning fikricha, bu summa 20 million yevrolik transfer budjetining qariyb yarmini tashkil etgani holda, ahmoqona pul sovurish bo‘lgan.

Fransiya birinchi divizionida ham endilikda katta pullar aylana boshladi. Klublarning moliyaviy salohiyati kengaya boshladi. Hamma tushunib turibdiki, “PSJ” bu borada “Marsel”ga nisbatan juda katta ustunlikka ega. Bu raqobat jarayonida marselliklar balki yana bir qator yetakchilarini sotishiga to‘g‘ri kelar? Ana unda chempionlikka erishish yanada qiyinlashib ketadi. Bunday vaziyatlarda Marselo qanday chora o‘ylab chiqar ekan, buni kutamiz va kuzatamiz.

Teglar