Mashhur multfilmlarda aks etgan 7 maskan

  • 00:31 / 30.11.2014
  • 4096

Sehrli qo‘rg‘onlar, xushmanzara tabiat, ajabtovur shaharlar – multfilmlarda tasvirlangan g‘aroyib manzaralar bolalarni ham, kattalarni ham birdek maftun etadi. Lekin inson haqiqiy olamdan butunlay ajralgan biror narsani o‘ylab topishi mushkul. Quyida multfilmlardan joy olgan haqiqiy maskanlar haqida so‘z boradi.

1. Noyshvanshtayn qo‘rg‘oni, Germaniya

“Yangi oqqush qo‘rg‘oni” (nemischadan tarjima qilinganda shu ma'noni bildiradi) Avstriya bilan chegaradosh Bavariyadagi tepaliklardan birida joylashgan. U XIX asrda qirol Lyudvig IIning buyrug‘i bilan bunyod etilgan. “Uolt Disney” Noyshvanshtaynni o‘tgan asrning 30-yillarida Yevropaga sayohat qilganida ko‘rgan. O‘sha paytlarda Disney ko‘ngilochar bog‘ yaratish g‘oyasi bilan yurardi va 1955 yili birinchi bo‘lib ochilgan Disneylend markazidan Noyshvanshtayn bilan bir xil qilib qurilgan uyqudagi malikaning qo‘rg‘oni  joy oladi. 1959 yili “Uyqudagi malika” multfilmida aynan mana shu qo‘rg‘on aks ettiriladi. 1985 yildan “Yangi oqqush qo‘rg‘oni”ning shakli “Walt Disney Pictures” kompaniyasining logotipiga aylanadi.

2. Toj Mahal maqbarasi, Hindiston

“Olovuddin” multfilmidagi oppoq devorlar va oltin gumbazlar ushbu maqbarani eslatib yuboradi. Aynan Toj Mahal ushbu multfilmning yaratilishiga turtki bo‘lganligini tasdiqlovchi rasmiy ma'lumotni topish qiyin. Lekin o‘xshashliklarni topsa bo‘ladi. Maqbara XVII asrda vafot etgan malika Mumtoz Mahal sharafiga Shohjahonning buyrug‘i bilan bunyod etilgan. Multfilmda esa sulton qizi Jasminni bir o‘zi tarbiyalaydi. Toj Mahal Agra shahrida, multfilmdagi saroy esa to‘qib chiqarilgan Agraba shahrida joylashgan.

3. Oltin Darvoza ko‘prigi, AQSh

Dunyodagi eng mashhur ko‘priklardan biri. Nafaqat San-Fransisko shahrining, balki “Qahramonlar shahri” multfilmidagi San-Fransokio shahrining ham tashrif varaqasi. “San-Fransokio — bu ikki shahar: San-Fransisko va Tokioning birlashgan shakli, — deydi prodyuser Roy Konli. — Biz bu shaharlarning eng yaxshi joylarini oldik va qahramonlar shahrini yaratdik”.

4. Garvard universiteti, AQSh

“Maxluqlar universiteti” filmida dunyoning eng nufuzli universitetlaridan biri bo‘lgan Garvard tasvirlangan: xuddi o‘sha binolar, auditoriyalar va talabalar yotoqxonalari.

5. Anxel sharsharasi, Venesuela

Dunyodagi eng katta sharshara (979 metr —Ostankino teleminorasidan deyarli ikki marta katta) “Tepaga” (Vverx) multfilmidagi Jannat sharsharasiga prototip bo‘lgan. Anxel Venesuelada, Kanayma milliy parki hududida joylashgan.  

6. Mon-Sen-Mishel, Fransiya

Parijdan 285 kilometr uzoqlikda joylashgan qal'ali orol “Rapunsel: chalkash voqea” multfilmidagi qirol saroyini yodga soladi. Animatorlar aynan Mon-Sen-Mishel ularni ilhomlantirganini ta'kidlashmaydi, lekin o‘xshashliklarni inkor etishmaydi. Bu orol XVIII asr oxiridan 1863 yilgacha qamoqxona vazifasini o‘tagan.  

7. Nidaros sobori, Norvegiya

Tronxeym (qadimgi nomi Nidaros) shahrida joylashgan cherkov “Muz yurak” multfilmidagi qahramonlardan biri Elzaning muz saroyi yaratilishiga turtki bo‘lgan. Sobor Norvegiya qiroli Avliyo Olaf dafn etilgan joyda qad ko‘targan. Ertakdagi saroy Nidaros soboridan faqat muzdan qurilgani bilan farqlanadi. Multfilmdagi Erendell qirolligi manzarasi esa Norvegiya manzarasidan olingan.

Manba: vokrugsveta.ru

Teglar