Қачон сув ичиш кераклигини эслатиб турувчи идиш

Ихтиролар 8-07-2015

Соғлом ҳаёт тарзи кейинги йилларда нафақат урфга кирди, балки заруратга айланди, десак муболаға бўлмас. Чунки технологияларнинг шиддатли ривожи бизни камҳаракат қилиб қўйди ва саломатлигимиз ёмонлашишига олиб келди. Мутахассислар кайфиятни қандай яхшилаш ва соғломроқ бўлиш тўғрисидаги турли-туман маслаҳатларни қалаштириб ташлашди.

Тўлақонли овқатланишдан ташқари, сув ҳам соғлом ҳаёт тарзининг асосий омилларидан биридир. Бир қараганда, етарли миқдорда суюқлик ичишдан осони йўқдек. Шундай бўлса-да, аксарият одамлар кучли ташналикни ҳис этгандагина ичишади. Бироқ шунда ҳам,  кўпчилик мутахассислар фикрича, кунига 1,5-2 литрдан иборат бўлган энг кам миқдорни ҳам истеъмол  қилишмайди.

Бир кунда қанча суюқлик ичиш ҳақида бир-биридан фарқланувчи тавсиялар мавжуд. HidrateMe номли “ақлли” бутилка миқдорда адашмасликда ёрдам беради. У смартфон эгасига ҳатто банд бўлган ёки ташналикни ҳис этмаётганда ҳам қачон ичиш лозимлигини эслатиб туради. Бундай вазиятда бутилка ўзидан нур таратади.

“Ақлли” бутилка кун давомида тўйиниш даражасини аниқлаш имконини берувчи махсус датчик билан жиҳозланган. Мабодо фойдаланувчи узоқ вақт давомида ичмаган бўлса, гаджет бу ҳақда ҳам эслатади. Бутилканинг ўзи 710 мл. ҳажмга эга ва бисфенол А аталмиш зарарли моддаси бўлмаган пластикдан тайёрланган. Уни идиш-товоқ ювиш машинасида чайиш ҳам мумкин, шунингдек, қулай очқичга ҳам эга.

HidrateMe смартфон ёрдамида ишлайди ва алоҳида илова кўмагида созланади. Фойдаланувчи бир кунда қанча суюқлик ичмоқчилигини ўз олдига мақсад қилиб қўйиши, ушбу режанинг бажарилишини назорат қилиши, статистикани  кузатиб бориши мумкин ва ҳоказо. Илова фитнес-трекер ва смарт-соатлар билан узвий боғланиши мумкин ҳамда ичилиши лозим бўлган сув миқдори, ҳаво ҳарорати, намлик миқдори ва бошқа  шартларни аниқ ҳисоблаш имконини беради.

Янгиликни ишлаб чиқариш учун маблағ тўплаш Kickstarter майдонида олиб борилмоқда. Тарғибот-ташвиқот тугашига 37 кун қолганда 35 минг доллар йиғиш лозим  бўлгани ҳолда 150 000 доллардан ошиқ маблағ тўпланди. “Ақлли” бутилка шу йил декабрида 45 доллар атрофидаги нарх билан пайдо бўлади.



МАҚОЛА МАНЗУР КЕЛГАН БЎЛСА ДЎСТЛАРИНГИЗ БИЛАН ҲАМ БЎЛИШИНГ

МАЗКУР БЎЛИМДАН ЭНГ СЎНГГИ МАҚОЛАЛАР



Изоҳлар

Изоҳингиз учун раҳмат. Тез орада сайт маъмурияти уни кўриб чиқиб, чоп этади.
Изоҳ ёзиш

Биринчилардан бўлиб изоҳ қолдиринг!

Биз сизга дунёнинг гўзаллигини эслатиб турамиз. Ишдан, мактабдан ва кўчадаги бошқа юмушлардан ҳориб уйга қайтганингизда, сизни ҳаётнинг оддий ва одатий ташвишларидан бироз чалғита олсак, ютуғизмиз шудир бизнинг.
Яндекс.Метрика

© 2018 XABARDOR.UZ