Qadimgi misrliklarda g‘ayrioddiy texnologiyalar bo‘lgani aniqlandi

  • 08:25 / 19.03.2019
  • 3309

Arxeologlar qadimgi Misr davriga tegishli bo‘lgan, cho‘kib ketgan qayiq qoldiqlarini topishdi. Bunga qadar olimlar bunday qayiq mavjud bo‘lganiga dalillar yo‘qligi tufayli uzoq vaqt davomida shubha bilan qarab kelishgan. Uning g‘ayrioddiy tuzilishi birinchi bo‘lib eramizdan avvalgi 450 yilda Herodot tomonidan tasvirlangan. Bu haqda The Guardian xabar bermoqda.

Tadqiqotchilar Iskandariyadan 32 kilometr shimoli-g‘arbdagi Nil etagi yonida joylashgan qadimgi Misrning Tonis-Geraklion shahri suv ostiga g‘arq bo‘lgan qismi yaqinidan qayiqni topishdi. «17-kema» deb nomlangan obektning qazilma ishlari kema yarim oy shaklidagi katta korpus va ilgari noma'lum bo‘lgan, turkumli tuzilmalarga ega qalin taxtalarni o‘z ichiga oluvchi konstruksiyaga egaligini ko‘rsatdi. Qayiq uzunligi 28 metrga teng bo‘lgan, deb baholanmoqda.

Ta'kidlanishicha, akas yog‘ochidan tayyorlangan qayiq korpusining 70 foizi yaxshi saqlanib qolgan. Kema o‘q rul yordamida boshqarilgan, u eshkak bilan bog‘langan hamda kema quyrug‘idagi ikki teshik orqali o‘tkazilgan. Olimlarning so‘zlariga ko‘ra, turkumli tuzilmalar kema konstruksiyasi noyob bo‘lgani va Herodot tomonidan tasvirlanganiga aniq mos kelishidan dalolat beradi.

Herodot - qadimgi yunon tarixchisi bo‘lib, eramizdan avvalgi 484-425 yillarda yashagan. U Bobil, Ossuriya, Misr, Kichik Osiyo, Bolqon yarim oroliga borgan. Asosiy ishi - «Tarix» risolasi, unda Yevrosiyodagi ko‘plab xalqlar hayoti tasvirlab beriladi.