Rejalashtirilganidek qulamagan binolar

  • 11:30 / 27.11.2015
  • 34607

Har yili butun dunyoda minglab bino va inshootlar qulatiladi. Bunda ko‘pincha nazorat portlashi deb ataluvchi usul qo‘llanadi va inshoot portlovchi modda yordamida qulatiladi. Bu usulning asosiy xususiyati shundaki, portlatishdan so‘ng inshoot ichidan qulaydi, bu esa tor joyda ham binoni qulatish imkoniyatini beradi.

Bu jarayon aslida ancha murakkab bo‘lib, binoni qulatish san'ati ham xuddi uni qurishdek qiyindir.

Ana shunday qulatishlar ba'zida noto‘g‘ri mo‘ljal oqibatida kulgili, ba'zan esa fojiali oqibatlarga ham olib keladi. Masalan, quyidagi voqealar kabi.


“Philips tower”, Niderlandiya

Bir paytlar  “Philips”ga tegishli bo‘lgan (Eyndxoven shahri, Niderlandiya) bu binoni qulatishga kirishgan mutaxassislar mo‘ljaldagidan kam portlovchi modda qo‘yishgan. Oqibatda portlashdan so‘ng lift shaxtasi omon qolgan va portlatuvchilar uni buldozer yordamida yiqitishgan.


Minora omborxona, Avstraliya

Avstraliyaning Redbank shahrida joylashgan bu qadimiy omborxona jangsiz taslim bo‘lishni istamadi.115 kilogrammportlovchi modda inshootni sal og‘ishga majbur qildi xolos. Shundan so‘ng u yana 40 daqiqa davomida Piza minorasi kabi turaverdi va ekskvatorlar uning asosini zaiflashtirgachgina ag‘darildi.


16 qavatli bino, Rossiya

Sevastopoldagi qurilishi bitmagan bu binoni qulatish bilan shug‘ullangan portlatuvchilar boshqalardan ajralib turishdi. Mutaxassislar 16 qavatli binoni birinchi urinishda qulata olishmagach, ular yaqin-atrofdagi binolarga zarar yetkazmasligi uchun portlovchi moddani oz qo‘yishganini bahona qilishdi. Bino uchinchi marta urinishdan so‘nggina quladi.


Silos minorasi, AQSh

Bunday uslubda ag‘darilayotgan minora oldida turishni hech kimga maslahat bermaymiz.


Omixta yem zavodi, AQSh

Janubiy Dakotadagi Su-Fols shaharchasidagi joylashgan bu binoni qulatishga urinishganida inshoot shunchaki butunicha podvalga tushib qoldi. U yana ikki hafta turdi va binoni an'anaviy yo‘l bilan yiqitishga to‘g‘ri keldi.


Amalga oshmagan qulatish, Rossiya

Bu video haqida to‘liq ma'lumot yig‘ishning imkoni bo‘lmadi, lekin uni tomosha qilar ekansiz, guvohlarning kadr ortida bu voqeani kulgili deb sharhlashlarini eshitish mumkin. Va ular haq.


Eski ombor, Turkiya

Bu «nazorat» qulatishi halokatbilan tugashi ham mumkin edi. Eski un ombori qulayotib yashash binolari oldida salto “oshmoqchi” bo‘ldi. Yaxshiyamki u vaqtida to‘xtadi va hech kim jabr ko‘rmadi.


Eski binoni qulatish, Xitoy

Yashash binolari uchun joy bo‘shatish maqsadida Lyuchjoudagi bu inshootni qulatish paytida mutaxassislar quyidagicha reja tuzishdi: inshootni porlatish orqali ikkiga ajratish va ularning qulashiga erishish. Uning birinchi yarmi quladi, lekin ikkinchi yarmi joyida turaverdi. Shundan so‘ng uni eski uslubda qulatishdi – kranlar va buldozerlar yordamida.


“Mad River” elektrostansiyasi, AQSh

Ogayodagi minorani qulatishga tayyorgarlik ko‘rish jarayonida mutaxassislar uning asosidagi armaturani kesib qo‘yishni unutishgan. Portlatish chog‘ida minora kutilgan yo‘nalishda emas, boshqa yo‘nalishda quladi va elektr uzatish simlarini uzib tashladi. Minglab odamlar elektrsiz qolishdi va keyinchalik elektrostansiya egalari portlatish guruhini sudga berishdi.


IESdagi «sinov», Kanada

Nyu-Bransuikdagi issiqlik elektrostansiyasining minoralari hech qanday portlashlarni pisand qilmadi. Ular hech narsa bo‘lmagandek joyida turaverdi.

Teglar