Seulda robotlar o‘zi uchun muzey quradi

  • 14:18 / 09.03.2019
  • 2989

Robotexnika va sun'iy idrok sohasidagi ko‘plab mutaxassislar tez orada robotlar odamlarning ish joylarini egallab, ularni “siqib chiqarishini” ta'kidlashmoqda. Robotlar avtomobil zavodlari va kompyuter texnikasini yig‘ish korxonalarida mehnat qilmoqda, odamlar yetib borolmaydigan, masalan, Marsdagi ekspeditsiyalar va inson hayoti uchun xavfli bo‘lgan yerlarda inson o‘rnini bosmoqda. Robotlardan foydalanishning yangi usuli haqidagi yana bir yangilik bu safar Seulda paydo bo‘ldi. U yerda robotlar yordamida muzey qurish rejalashtirilmoqda. Bu robototexnika muzeyi bo‘ladi. Melike Altinisik Architecs turk firmasi loyiha muallifidir.

Bu inshootga mos keluvchi futuristik uslub tanlangan. Muzey fasad qismi plastin-pazllardan iborat, muzeyning o‘zi esa sfera shaklida bo‘lishi rejalashtirilgan. Muzeyning ichki dizayni ham qiziqarli ko‘rinishda. Loyiha mualliflari turli robotlardan foydalanish vaqt va pulni tejabgina qolmay, qurilish vaqtidayoq istiqboldagi auditoriyani jalb etishiga umid bildirishmoqda. Axir robotlarning ish jarayonini kuzatish juda ajoyib bo‘ladi.

Binoning beton konstruksiyalari 3D printerida bosilishi rejalashtirilmoqda. Turli robotlar va uchuvchisiz uchish apparatlari bino elementlarini yig‘ishda ishtirok etadi. Biroq qurilishning asosiy bosqichlari albatta odamlar tomonidan nazorat qilinadi.

Qurilishning boshlanishi 2020 yilga mo‘ljallangan. Aynan shu yili Seulda robototexnika muzeyi ochiladi. U odamlarning bu sohaga qiziqishini oshirish, shuningdek shahar aholisi va poytaxt mehmonlarini robotlarni ishlab chiqarish hamda ularni qo‘llash borasidagi so‘nggi yutuqlar bilan tanishtirishga mo‘ljallangan.