Shayx Muhammad Sodiq Muhammad Yusuf masjidiga imom-xatib tayinlandi

  • 15:21 / 13.05.2019
  • 680

Kuni-kecha Toshkent shahrida nafaqat yurtimiz, balki islom olamida mashhur bo‘lgan, ulug‘ alloma Shayx Muhammad Sodiq Muhammad Yusuf rohmatullohi alayh nomlaridagi muhtasham jome masjidning ochilish marosimi bo‘lib o‘tdi. Prezident Sh.Mirziyoyev tashabbusi bilan bunyod etilgan mazkur majmua Ramazon oyida xalqimizga katta tuhfa bo‘ldi.

11 may kuni ushbu jome masjidga Shayx Muhammad Sodiq Muhammad Yusuf hazratlarining o‘g‘illari, boshlagan xayrli ishlarining davomchisi, bir necha islomiy tashkilotlarning a'zosi va mo‘min-musulmonlarga juda katta xizmat qilayotgan «Hilol nashr» majmuasi rahbari Ismoil Muhammad Sodiq Muhammad Yusuf imom-xatib etib tayinlandi. Shuningdek, Shayx hazratlarining suyukli shogirdlari, hofizi Kalomulloh Bahodir qori Rahmatullev esa mazkur masjid imom noibi bo‘ldi, deb xabar bermoqda O‘zbekiston musulmonlari idorasi matbuot xizmati.

Ismoil Muhammad Sodiq kuchli ilmiy salohiyat, hayotiy tajriba va noyob iste'dod sohibi hisoblanadi. U 1976 yilda Toshkent shahrida tavallud topgan. 1994 yil «Islomiy da'vat kulliyasi»ga o‘qishga kirdi. To‘rt yil bakalavr bosqichida, so‘ng ikki yil magistraturada o‘qib, 2001 yili ushbu kulliyani tamomladi. Shundan so‘ng, elchixonalarda, diniy ta'lim muassasalarida, nashr ishlarida, sayt xizmatlarida va ta'lim markazlarida faoliyat olib bordi.

Hozirda Ismoil Muhammad Sodiq «Hilol nashr» matbaa nashriyoti rahbari hisoblanadi.

11 may kuni ushbu masjidda taroveh namozi ado etilib, xatmi Qur'on boshlanadi. Taroveh namozida O‘zbekiston musulmonlari idorasi raisi, muftiy Usmonxon Alimov hazratlari, ulamolar, marhum va mag‘fur Shayx hazratlarining yaqinlari, shogirdlari ishtirok etishdi.