Snapchat учун 34 млрд доллар: нима учун бу мессенжер Twitter ва Ferrari’дан қимматроқ туради?

Софт 4-03-2017

The New York Times нашри таҳлилчилар билан суҳбатлашди ва биржага чиққан Snap компаниясининг (Snapchat мессенжерининг ишлаб чиқарувчиси) юқори қиймати нима билан боғлиқ эканини аниқлади.

«Snapchat ҳақида деярли барча эшитган – хабарлар ва фотосуратлар алмашишга мўлжалланган илова. У ўсмирларга мўлжалланган бўлиб, ҳаттоки ёши 35дан катталарга ҳам ёқади (Snapchat уларни ёши анча катта деб ҳисоблайди)», - деб ёзади The New York Times.

Сизни ўз-ўзини йўқотувчи фотосуратларнинг жўнатилиши қизиқтирмаса ҳам, бундай технология қандай қилиб 34 млрд долларга баҳоланиши аниқ ўйлантиради.

2017 йилнинг 2 мартида Snapchat’ни ишлаб чиққан компания - Snap Inc Нью-Йорк фонд биржасида ўз акцияларини жойлаштирди. Савдолар очилгунга қадар бир дона акция нархи 17 долларни ташкил этган бўлса, биржа ёпилишида бу кўрсаткич – бир дона учун 24,48 долларни ташкил этди – бошланғич қийматдан 44 фоизга кўпроқ. Шу тариқа Snap’нинг бозордаги қиймати тахминан 34 млрд долларни ташкил этди.

Таҳлилчиларнинг таъкидлашича, Snapchat’нинг айни пайтдаги қиймати сармоядорларнинг компанияга ишончи билан боғлиқ – шу билан бирга, у Snap’нинг 2020 йилдаги эҳтимолий даромадидан 5-8 баробарга ортиқ. «Snapchat Facebook ва Alibaba билан бир майдонда ўйнайди, бироқ мессенжер ва бу икки компания ўртасидаги фарқ - Facebook ҳамда Alibaba’нинг анча йирикроқ эканидадир – бунинг устига улар кўпроқ даромад келтиради».

Snap ҳозирча ўз эгаларига ҳеч қандай даромад олиб келмаяпти. 2016 йилда компания 515 млн долларлик чиқимга эга бўлган бўлса, 2015 йилда бу кўрсаткич 373 млн долларга тенг эди. «Snapchat компания тижорий фаолиятининг бошлаган йилдан (2011 йил) бери ҳар йили катта маблағларни йўқотмоқда, ҳамда ҳеч қачон даромад олиб келишни бошламаслиги ҳам мумкин», - дея таъкидлашган The New York Times’да.

Шу нуқтаи назардан муҳарририятнинг таъкидлашича, Snapchat’ни Twitter билан таққослаш ўринли – у ҳам маблағларни барқарор равишда йўқотиб борувчи ижтимоий тармоқдир.

«Албатта, Snap’даги ҳеч кимга уларни Twitter билан солиштиришлари керак эмас. Ижтимоий тармоқда янги фойдаланувчиларни жалб этиш ва рекламадан даромад олиш борасида муаммолар етарлича». Twitter 2013 йилда IPO’га чиққан бўлиб, компаниянинг бир акцияси қиймати 26 долларни ташкил этганди. Бироқ ушбу мақола ёзилаётган пайтда ижтимоий тармоқ акцияси тахминан бир дона учун 15,8 долларга баҳоланмоқда.

2016 йилда Snap’нинг сотувлардан тушган даромади 404 млн долларни ташкил этди. Бу компаниянинг 2017 йил 2 март кунидаги савдолар якуни бўйича бозордаги қийматидан 84 мартага камроқ. Facebook’да эса бундай ҳолат (бозордаги қийматнинг савдоларга бўлган нисбати) 6 марта камроқ ва 14га тенг. Google’ни бошқарувчи Alphabet’да эса 14 маротабага камроқ ва 6ни ташкил этади. Amazon бу кўрсаткич - 3, Netflix’да – 7га тенг.

«Уларнинг бари анча аввал ташкил этилган компаниялар бўлиб, уларнинг ўсиш суръати пасайди», - дея таъкидлайди The New York Times. Таҳлилчиларнинг фикрича, Snap ўзининг юқори қийматини оқлаши учун ҳар йили камида 50 фоизлик ўсишни кўрсатиши керак, компаниядаги ўз харажатини ўзи қоплаш ҳажми эса 25 фоиздан пастга тушиши керак эмас.

Бу компания фақатгина пулларни йўқотишини ҳисобга олсак, жуда юқори кўрсаткич. Тарихда жуда кам компаниялар бундай муваффақиятга эришган
— Sageworks таҳлил компанияси асосчиларидан бири Брайан Гамильтон.

«Яхши, келинг даромад ва фойдаларга эътибор бермаймиз. Snapchat нима бўлган тақдирда ҳам – бу ижтимоий тармоқ, ҳамда компания учун асосий кўрсаткичлар – ҳар кунги фаол фойдаланувчилар сони ва контент билан ўзаро ҳаракатлар миқдори», - дея ёзади The New York Times.

2016 йилнинг охирида Snapchat’нинг ҳар кунги фаол фойдаланувчилари сони 158 млн.ни ташкил этди. Шу тариқа, бир фойдаланувчининг қиймати 215 долларга тенг.

Facebook Instagram’ни 1 млрд долларга харид қилган пайтда, ижтимоий тармоқнинг ҳар кунги фаол фойдаланувчилари сони 30 млн.га тенг эди. 2017 йилнинг январь ойида бу кўрсаткич 300 млн.га қадар ўсди. The New York Times’нинг ёзишича, агарда Instagram’нинг ҳар бир фойдаланувчисини 215 долларга баҳоласак, ижтимоий тармоқ қиймати 64,5 млрд долларни ташкил этади.

Snapchat раҳбариятининг сўзларига кўра, 2016 йилда ҳар кунги фаол фойдаланувчилар миқдорининг ўсиши 48 фоизни ташкил этди. 2017 йилда компания кўрсаткични шу даражада ушлаб турса, ҳар кунги фаол фойдаланувчиларнинг умумий миқдори 234 млн.га тенг бўлади. «Ажойиб натижа, бироқ Instagram’дан ҳали анча кам», - дея таъкидлайди нашр муҳарририяти.

Бироқ, 2016 йилнинг кузида Instagram Stories функциясини ишга туширгандан сўнг, кўрсаткичнинг ўсиш даражаси пасайди. Бунга қадар компания ҳар кунги фаол фойдаланувчилари ҳар бир чоракда 15 млн.га ўсиб борди, янги функция ишга туширилгандан сўнг эса – атиги 5 млн.ни ташкил этди. Шу билан бирга, Instagram Stories фаол фойдаланувчиларнинг ҳар кунлик базаси ҳозирнинг ўзида 150 млн.ни ташкил этди.

Snapchat фойдаланувчиларнинг сони яна қанча муддат ўсиб боради? Сервис асосан ёшларга мўлжаллангани ҳисобга олинса, эҳтимол, компания ҳозирнинг ўзидаёқ ўзининг энг юқори натижасини кўрсатиб бўлгандир. АҚШда 19-34 ёшидаги кишиларнинг сони 70 млн.га тенг. Snapchat’нинг АҚШдаги фойдаланувчилари миқдори ҳам худди шунчага тенг.

Snapchat йилига АҚШдаги ҳар фойдаланувчи орқали 5,8 доллар ишлаб топади. Таққослаш учун - Facebook Қўшма Штатлардаги ҳар бир фойдаланувчидан 12,8 доллар ишлаб топади. «Бу ерда ўсиш учун имкон бор», - дея таъкидлайди таҳлилчилар.

Таҳлилчи Перри Голднинг фикрича, кўплаб сармоядорлар Snap акцияларини яқин орада уларнинг нархи ошишидан умидвор бўлган ҳолда харид қилишган – уларни кейинчалик анча баланд нархда сотиб юбориш мумкин. Шу билан бирга, баъзиларнинг тахминича, Snap яқин орада жиддий муаммолар билан дуч келади. «Шуниси аниқки, сармоядорларнинг қиммат ижтимоий медиаларга талаби бор. Улар фақатгина тезроқ пул ишлаб олиш ёки акцияларни узоқроқ муддатга сақлаб туришни режалаштиришаётгани масаласи номаълумлигича қолмоқда».

Менинг фикримча, вазият Twitter’га жуда ўхшайди
— Брайан Гамильтон



МАҚОЛА МАНЗУР КЕЛГАН БЎЛСА ДЎСТЛАРИНГИЗ БИЛАН ҲАМ БЎЛИШИНГ

МАЗКУР БЎЛИМДАН ЭНГ СЎНГГИ МАҚОЛАЛАР



Изоҳлар

Изоҳингиз учун раҳмат. Тез орада сайт маъмурияти уни кўриб чиқиб, чоп этади.
Изоҳ ёзиш

Биринчилардан бўлиб изоҳ қолдиринг!

Биз сизга дунёнинг гўзаллигини эслатиб турамиз. Ишдан, мактабдан ва кўчадаги бошқа юмушлардан ҳориб уйга қайтганингизда, сизни ҳаётнинг оддий ва одатий ташвишларидан бироз чалғита олсак, ютуғизмиз шудир бизнинг.
Яндекс.Метрика

© 2017 XABARDOR.UZ