Toshkentda fuqaroning hovlisini suddagi tanishlari orqali $40 ming evaziga olib berishni va’da qilgan advokat qo‘lga olindi – video

  • 11:23 / 26.06.2021
  • 205

DXX idoralari tomonidan joylarda “2021-yilda yangi ish o‘rinlarini tashkil etish va aholi bandligiga ko‘maklashish bo‘yicha Davlat dasturi to‘g‘risida”gi Prezident qarori ijrosini ta’minlash jarayonida korrupsion holatlarning oldini olish bo‘yicha o‘tkazilgan tezkor tadbirlarda qator jinoiy xatti-harakatlarning oldi olindi.

Xususan, Xorazm viloyati tumanlaridan birining Aholi bandligiga ko‘maklashish markazi direktori o‘z mansab vakolatini suiste’mol qilgan holda, ishlab chiqarish kooperativ rahbaridan 10 mln. so‘m olgan vaqtida ashyoviy dalillar bilan ushlandi.

Aniqlanishicha, ushbu mansabdor shaxs mazkur kooperativga a’zo bo‘lgan 67 nafar kam ta’minlangan oila vakillari uchun 122,5 mln. so‘m miqdorida davlat byudjetidan subsidiya ajratib berib, evaziga 10 mln. so‘m talab qilgan.

Shuningdek, Toshkent shahar Yakkasaroy tumanidagi advokatlik firmalaridan birida advokat bo‘lib ishlovchi ayol jinoyat ishlari bo‘yicha Olmazor tuman sudining hukmiga asosan “Davr bank” XATBning Olmazor tuman filiali hisobiga o‘tkazilgan hovli-joyni sud organlarida yuqori lavozimda ishlovchi tanishlari orqali qaytarib olib berish evaziga 40 ming AQSh dollari talab qiladi.

U so‘ralgan pulning 20 ming dollarini oldindan olgan vaqtida DXXning Toshkent shahar bo‘yicha boshqarmasi, shahar prokuraturasi va Departament xodimlari tomonidan ashyoviy dalillar bilan ushlandi.

Toshkent shahrida kuzatilgan yana bir holatda esa 1994-yilda Namangan viloyatida tug‘ilgan fuqaro o‘zganing ishonchiga kirib, uni Qirg‘iziston Respublikasidagi tibbiyot yo‘nalishiga ixtisoslashgan oliygohning birinchi bosqichini tamomlaganligi to‘g‘risidagi qalbaki hujjatlarni tayyorlab, so‘ngra mamlakatimizdagi tibbiyot oliy o‘quv yurtlaridan birining ikkinchi bosqichiga kiritib berishni va’da qiladi hamda evaziga 5,5 ming AQSh dollari so‘raydi.

U mazkur pul mablag‘ini olgan vaqtida ashyoviy dalillar bilan ushlandi.

Qoraqalpog‘iston Respublikasining Chimboy tumanida yashovchi, 1982-yilda tug‘ilgan fuqaro qurilish firmasi ish yurituvchisining ishonchiga kirib, unga mansabdor tanishlari orqali qurilish ob’yekti olib berishini aytadi va evaziga qurilish ob’yekti uchun byudjetdan ajratiladigan 8 mlrd. so‘m miqdoridagi pul mablag‘ining 8 foizini berishini so‘raydi.

O‘tkazilgan tezkor tadbirida firibgar shaxs avans sifatida 5 ming AQSh dollari olgan vaqtida ushlandi.

Hozirda mazkur shaxslarga nisbatan Jinoyat Kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.