“Rossiya bolalarni ballistik qurollar bilan o‘ldirayotganini yashirish noto‘g‘ri va xavfli. Bu Moskvadagi razillarning urushni davom ettirish va diplomatiyani mensimaslik kabi ishlarini qo‘llab-quvvatlaydi”, — deydi Zelenskiy 5-aprel kuni kechqurun Krivoy Rogga bo‘lgan hujumga munosabat bildirar ekan.

Rossiyaning raketa va dronlar hujumi oqibatida 18 kishi, jumladan to‘qqiz nafar bola halok bo‘ldi. Ma’lum qilinishicha, jabrlanganlar soni 74 kishiga yetgan. Ularning 37 nafari, shu jumladan besh nafar bola shifoxonalarda davolanmoqda. Keyinroq yana bir kishi ayni hududga uyushtirilgan dron hujumidan halok bo‘lgan.

Hujum sodir bo‘lgan kunda Zelenskiy shifoxonada 3 yoshli bola vafot etgani haqidagi xabarni ijtimoiy tarmoqlarga joylashtirgan edi. U halok bo‘lgan bolalarning ismlarini sanab o‘tib, turli davlatlar, jumladan, Germaniyaga “prinsipial pozitsiyasi uchun” minnatdorchilik bildirdi. Ammo, AQSh elchixonasining munosabati “hayratda qoldirayotganini” ta’kidladi. “Shunchalik kuchli mamlakat ushbu holatlarga shu darajada sovuqqon munosabatda bo‘layotganini ko‘rib hayron qolyapmiz. Bolalarni o‘limiga sabab bo‘lgan raketalar haqida gapirishganda hatto “Rossiya” so‘zini ishlatishdan qo‘rqishyapti”, — deb yozadi Ukraina rahbari.

• Bolalar
• Havo hujumi
• Raketa
• Rossiya
• Ukraina
• Urush
• Zelenskiy