Bu urush Isroil va Falastin o‘rtasidagi urush emas, balki butun dunyo bo‘ylab zolimlar va mazlumlar o‘rtasidagi kurashdir. Bu haqda Turkiya tashqi ishlar vaziri Xakan Fidan Gambiya poytaxti Banjulda bo‘lib o‘tgan Islom hamkorlik Tashkilotining 15-sammitida so‘zlagan nutqida ma’lum qilgan.

“Hech birimiz falastinliklarning qoni orqali muammolarimiz yoki raqobatimizni hal qilishga haqqimiz yo‘q”, – degan Turkiya vaziri.

Tashqi ishlar vazirligi rahbari, agar Isroil Rafah bo‘yicha rejalarini amalga oshira olsa, dunyo ta’riflab bo‘lmaydigan darajada yana bir falokatga guvoh bo‘lishini ta’kidlagan.

Uning so‘zlariga ko‘ra, Isroil javobgarlikka tortilishi kerak bo‘lsa ham, jazosiz qolmoqda.

“Bu bizning sinovimiz. Biz birlashishimiz kerakligini isbotlashimiz kerak. Biz Islom dunyosi diplomatik kanallar va kerak bo‘lganda majburiy choralar orqali natijalarga erishishi mumkinligini ko‘rsatishimiz kerak. Islom tarixi halokatli mojarolarga to‘la. Bugun biz bu xatolarni takrorlay olmaymiz. Falastin ishi mintaqaviy raqobatga qurbon bo‘lishi mumkin emas. Hech birimiz falastinliklarning qoni tufayli muammolarimiz yoki raqobatimizni hal qilishga haqqimiz yo‘q. Agar Islom olamining birdamligi va birligi yo‘qolsa, yagona g‘olib Isroil va uning tarafdorlari bo‘ladi”, – deya ta’kidlagan vazir.

• Falastin
• Gambiya
• Isroil
• Tashqi ishlar vazirligi
• Turkiya