Forbes talqini boʻyicha eng yuqori daromadli erkak sportchilar reytingi eʼlon qilindi. Unga koʻra, dunyodagi eng koʻp maosh oladigan sportchilar uchligiga faqat futbolchilar kirgan.

Xususan, portugaliyalik futbolchi Krishtianu Ronaldu Amerikaning Forbes jurnali tomonidan tuzilgan eng yuqori daromadli sportchilar roʻyxatida birinchi oʻrinni egallagan. Uning soʻnggi 12 oydagi umumiy daromadi 136 mln dollarga baholangan.

Ronaldu bu mablagʻning atigi uchdan bir qismini – 46 million dollarni futbol maydonida ishlab topgan. Portugaliyalik futbolchi 2022-yil noyabr oyida “Manchester Yunayted”ni tark etib, 2023-yilning yanvarida Saudiya Arabistonining “Al-Nassr” klubiga oʻtgan edi.

Yana 90 million dollar esa Ronalduning stadiondan tashqaridagi, shu jumladan, reklamadan tushgan daromadi hisobidan.

Reytingning ikkinchi pogʻonasidan oʻtgan yilgi yetakchi, 35 yoshli argentinalik futbolchi Lionel Messi joy olgan. Uning yillik daromadi oʻzgarmagan holda 130 million dollarni tashkil etgan.

Bu qiymatning yarmini Adidas, Budweiser, PepsiCo va boshqa brendlar bilan tuzilgan reklama shartnomalaridan olgan.

Yana bir futbolchi, 24 yoshli fransiyalik Kilian Mbappe dunyoning eng koʻp maosh oluvchi sportchilari uchligiga kirgan. U oʻtgan yili 120 million dollar ishlab topgan boʻlsa, shundan 100 million dollari futbol maydonidan kelgan.

Forbes talqiniga koʻra, dunyoning eng koʻp maosh oluvchi TOP-10 sportchisi:

1. Krishtianu Ronaldu (futbolchi) – 136 mln dollar

2. Lionel Messi (futbolchi) – 130 mln dollar

3. Kilian Mbappe (futbolchi) – 120 mln dollar

4. Lebron Jeyms (basketbolchi) – 119,5 mln dollar

5. Kanelo Alvarez (bokschi) – 110 mln dollar

6. Dastin Jonson (golfchi) – 107 mln dollar

7. Fil Mikelson (golfchi) – 106 mln dollar

8. Stefan Karri (basketbolchi) 100,4 mln dollar

9. Rojer Federrer (tennischi) 95,1 mln dollar

10. Kevin Durant (basketbolchi) 89,1 mln dollar

Qayd etish mumkin, reytingni tuzishda Forbes 2022-yilning 1-mayidan 2023-yilning 1-mayigacha sportchilarning ish haqi va boshqa barcha daromadlarini hisobga olgan.

Shu tariqa, dunyoning eng koʻp maosh oluvchi oʻn nafar sportchining yillik umumiy daromadi 1 milliard dollardan oshgan.

• Forbes
• Futbol
• Messi
• Ronaldu