Ulug‘bekning shahid etilgani dalili ediki, jasad tobutda chalqancha yotar, bir yelkasini tuproq bilan ko‘tarib, qiblaga moyil qilingan va uzib olingan kallasini ko‘ksiga qo‘yib dafn etilgan edi.

Professor Gerasimov bu haqdagi bayonnomaga tubandagilarni qayd etgan: “Faqat baquvvat va tajribali qotilning zarbasigina shunday bo‘lishi mumkin. Qilich o‘ng yondan urilgan, marhum cho‘kkalatilgan, jallod uning oldida turgan. Umurtqani kesib o‘tgan sezilar-sezilmas titroq to‘lqin tig‘ning juda o‘tkir va zarbaning behad shiddatli bo‘lganidan dalolat beradi”.

Antropolog L.V.Oshanin Mirzo Ulug‘bek jasadini irqiy jihatdan o‘rganib, quyidagilarni aniqlagan: Ulug‘bekda mo‘g‘ul irqi belgilari Amir Temurga nisbatan kam, u otasidan ko‘ra bobosiga ko‘proq o‘xshaydi, bo‘yi – 165,8 santimetr hisoblandi. Taniqli o‘zbek antropologi Telman Xo‘jayev 1995-yili Ulug‘bekning bo‘yi 171 santimetr ekanini aniqlagan. U o‘z xulosasini AQSh olimlari kashf etgan yangicha ilmiy uslubga asoslangani bilan izohlaydi.

• Tarix