Xalqaro shaxmat federatsiyasi (FIDE) kuni kecha o‘zining yangi reytingini eʼlon qildi.
2022-yilning 1-aprel sanasidan keyingi holat aks etgan ushbu jadvalda ayni damda kuchli 100 likdan ikki nafar o‘zbekistonlik shaxmatchi o‘rin olgan. Bular jahonning 17-chempioni, xalqaro grossmeyster Rustam Qosimjonov hamda yaqinda rapid yo‘nalishi bo‘yicha dunyodagi eng yosh chempionga aylangan Nodirbek Abdusattorovdir.
Eʼtiborli jihati, yangilangan reytingda o‘zbekistonlik shaxmatchilar orasida peshqadam o‘zgardi. 1997-yilda FIDE reytingida O‘zbekistonning eng yuqori ballga ega shaxmatchisi maqomini qo‘lga kiritgan Qosimjonov chorak asrdan so‘ng o‘rnini yosh va iqtidorli izdoshiga bo‘shatib berdi.
FIDEning yangilangan reytingida xalqaro grossmeyster N.Abdusattorov (2004-yilda tug‘ilgan) 2 661 ball bilan 74-o‘rinni egallab turibdi. O‘tgan oyda u 92-o‘rindan joy olgan edi. Rustam Qosimjonov (1979-yilda tug‘ilgan) esa 2 656 reyting bali bilan 82-pog‘onaga tushdi. Bir oy avval 17-jahon chempioni 77-o‘rinda qayd etilgan edi. TOP-100talikda Nodirbekdan yosh birorta ham shaxmatchining yo‘qligi bizni yana-da xursand qiladi.
FIDE 20 yoshgacha bo‘lgan shaxmatchilarning reyting o‘rinlarini ham alohida hisoblab boradi. Eng kuchli yosh shaxmatchilar orasida Nodirbek ayni paytda 4-o‘ringa ko‘tarildi. Shuningdek, yosh shaxmatchilar orasida TOP-100talikdan yana uch nafar shaxmatchimiz o‘rin olgan:
4 (o‘tgan oydagi o‘rni – 7). GM Nodirbek Abdusattorov (2004) – 2661,
11 (10). GM Nodirbek Yoqubboyev (2002) – 2630,
17 (16). GM Javohir Sindorov (2005) – 2609,
25. GM Shamsiddin Vohidov (2002) – 2536.
Rapid yo‘nalishida faqat Nodirbek Abdusattorov kuchli yuzlikda qayd etilgan, u 2670 ball bilan 37-o‘rinni egallab turibdi.
Blis yo‘nalishida 4 nafar o‘zbekistonlik shaxmatchi kuchli yuzlikdan joy olgan:
36. Rustam Qosimjonov – 2681.
45. Nodirbek Abdusattorov – 2663.
71. Javohir Sindorov – 2630.
96. Shamsiddin Vohidov – 2611.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!