Rim papasi Fransisk Isroil va Falastinni “kelishuv va tinchlik yo‘llari”ni ochish uchun muloqotni qayta boshlashga chaqirdi. Bu haqda Vatikan axborot agentligi xabar bermoqda.

“Muqaddas zaminda yana qon to‘kilgani haqidagi xabardan tushkunlikka tushdim. Umid qilamanki, Isroil va Falastin yetakchilari zo‘ravonlik spiraliga barham berish, yarashuv va tinchlik yo‘lini ochish maqsadida to‘g‘ridan-to‘g‘ri muloqotni qayta boshlashlari mumkin”, – dedi pontifik Vatikandagi Avliyo Pyotr maydoniga yig‘ilgan dindorlarga murojaati chog‘ida.

Rim-katolik cherkovi rahbari O‘rtayer dengizida muhojirlarni qutqarish uchun sa’y-harakatlarni amalga oshirayotgan nodavlat tashkilotlarga ham o‘z minnatdorligini bildirdi. Falastindagi so‘nggi keskinlik 3-iyul kuni Jenin shahri yaqinida sodir bo‘ldi.

Isroil harbiylari shaharni 48 soat davomida qamal qilib, bir qancha mahallalarga havodan zarbalar berdi. 12 nafar  falastinlik halok bo'ldi, ulardan to'rt nafari o'smir, 120 ga yaqini yaralandi, yigirma nafarining ahvoli og'ir.

• Falastin
• Isroil
• Rim papasi