Viloyat hokimi Akmaljon Maxmudaliyev ayni kunda qisqa muddatli mehnat ta’tilida bo‘lganligi sababli ilg‘or yoshlar yetakchilaridan biri Rahimjonov Dilmurod Bahodir o‘g‘li viloyat hokimi vazifasini bajaruvchi etib tayinlandi.

Bundan ko‘zlangan asosiy maqsad zamonaviy bilim va tafakkurga ega, tashabbuskor kadrlarni tayyorlash, yoshlarga o‘z rahbarlik qobiliyatlarini to‘la namoyon etishlari uchun zamin hozirlash va ularga motivatsiya berishdan iborat.

Viloyat hokimi o‘rinbosarlari va boshqaruv apparati xodimlari ishtirokida o‘tgan yig‘ilishda D.Rahimjonov hokimlik jamoasiga tanishtirildi.

Unda so‘zga chiqqan viloyat hokimining birinchi o‘rinbosari Raximjon Boboyev viloyat hokimi Akmaljon Maxmudaliyev tashabbusi bilan amaliyotga tatbiq etilayotgan ushbu tajribaning ahamiyati xususida to‘xtaldi.

Bugundan o‘z vazifasiga kirishgan D. Rahimjonov belgilangan kun tartibiga muvofiq viloyatdagi investitsion loyihalar, ijtimoiy soha obyektlari, qurilish va qishloq xo‘jaligi sohasida olib borilayotgan ishlar bilan tanishadi. Shuningdek, hududlarda sayyor qabul hamda yoshlar bilan uchrashuvlar o‘tkazilishi ham rejalashtirilgan.

Ma’lumot o‘rnida, 28 yoshli D. Rahimjonov 2022-yildan buyon Guliston shahar Do‘stlik mahallasi yoshlar yetakchisi sifatida faoliyat yuritib kelmoqda. U 2023-yilda o‘tkazilgan "Yilning eng namunali yoshlar yetakchisi" Respublika tanlovida 3 o‘rinni egallagan.

• Sirdaryo
• hokim