Uy vazifalari maktab o‘quvchilari uchun doimiy muammo bo‘lib kelgan. O‘quv mashg‘ulotlaridan charchab kelgan bolalar uyda yana dars stoliga o‘tirishga majbur bo‘lishadi. Baʼzilar esa tuni bilan topshiriqlar ustida ishlaydi. Xo‘sh, uy ishlarini bajarish uchun bola qancha vaqt sarflashi kerak? Qanday qilib farzandingizga ularni tez va samarali bajarishda yordam berishingiz mumkin?

Bu bo‘yicha taʼlim va psixologiya sohasi mutaxassislaridan bir qancha tavsiyalarni ulashamiz.

Muxataxassislarning fikriga ko‘ra, 2-3-sinf o‘quvchilari uy vazifalariga 1,5 soat, 4-5-sinflar 2 soat, 6-8-sinflar 2,5 soat, 9-11-sinf o‘quvchilari 3 soat vaqt ajratishlari mumkin.

Pedagogika fanlari nomzodi Svetlana Guskova 1-sinfda uy vazifasi umuman bo‘lmasligi kerak deb hisoblaydi.

"Maktab hayotiga moslashish maʼlum vaqtni oladi, shuning uchun majburiy uy vazifasi bo‘lmasligi kerak, chunki u bolani qiynab qo‘yadi va o‘rganish uchun motivatsiyasini kamaytiradi", deydi u.

Deyarli barcha ota-onalar farzandlarining uy ishlarida ularga yordam beradi. Lekin kattalar bu borada ko‘pincha xatoga yo‘l qo‘yishadi. Yaʼni o‘z bolasini sinfdagi boshqa bolalar bilan taqqoslash va o‘qishga motivatsiya bermaslik orqali.

Shuningdek, mutaxassis ogohlantiradi: bolani ovqatdan keyin darhol dars qilishga majburlamaslik kerak. Chunki organizm ovqatni hazm qilish vaqtida intellektual qobiliyatlar biroz pasayadi.

Agar bola uy vazifasini o‘ziga qulay vaqtda bajarsa, u ko‘proq kuchga ega bo‘ladi, topshiriqlar tezroq va osonroq bajariladi.

Ko‘pincha ota-onalar darslarni maktabdan so‘ng darhol boshlash yaxshiroq degan fikrda. Ammo bolalarda bu tamoyil ishlamaydi.

Bola kun bo‘yi maktabdagi shovqinli muhitda, ko‘p odamlar orasida bo‘ladi, asabiylashadi yoki o‘zini yomon his qiladi. Shuning uchun o‘quvchining yaqinlari unga dars uchun tinch va qulay muhit yaratib berishi maqsadga muvofiqdir.

“Bola sinfdagidan ko‘ra uyda ko‘proq narsaga erisha oladi. Bola uy vazifasini bajaradigan joyda uy tinch, osoyishta va toza bo‘lishiga ishonch hosil qiling”, — deydi pedagoglardan biri.

Bola yaxshi o‘qishi uchun 5 ta muhim tavsiya:

1) Farzandingizni chalg‘itadigan barcha narsalarni, shu jumladan, gadjetlarni olib qo‘ying.

2) 25 daqiqa o‘qib, 5 daqiqa dam olishni o‘rgating.

3) Eng muhim vazifalarni birinchi bajarish kerakligini uqtiring.

4) Katta vazifalarni qismlarga bo‘lib, ularni haftaning kuni bo‘yicha taqsimlash kerakligini ayting.

5) Yordam so‘rash kerakligini tushuntiring.

• Maktab
• Oila