AQShning Missuri shtati Xitoy Xalq Respublikasini koronavirus pandemiyasida ayblab, sudga berdi. Bu haqda shtat bosh prokurori Erik Shmitga tayanib, The Guardian xabar bermoqda.

“Xitoy hukumati COVID-19’ning xavfi va yuqumli ekanligi haqida butun dunyoga yolg‘on gapirdi, shikoyat qilganlarni jim qildi va kasallik tarqalishini to‘xtatish uchun hech narsa qilmadi. Ular o‘z qilmishi uchun javob berishi kerak”, dedi Shmit.

Shtat ma’muriyati Xitoydan “jamoat tartibini buzganlik”, “o‘ta xavfli xatti-harakatlarni sodir etganlik” va “majburiyatlarni bajarmaganlik” uchun tovon to‘lashni talab etmoqda. Ammo tovon pulining aniq miqdori aytilmagan.

“Sud jarayoni katta ta’sir ko‘rsatadimi, yo‘qmi buni aniq bilmaymiz. AQSh qonunlari boshqa davlatlarga qarshi qaratilgan sud ishlarini taqiqlaydi, ammo ushbu vaziyat bundan mustasno”, deydi Kaliforniya universitetining xalqaro huquq fanlari professori Chimene Keitner.

Missuri shtati ma’muriyati, shuningdek, XXRni virusni dastlabki bosqichda ushlab turmaganlikda ayblamoqda. 1-yanvar kuni 175 ming kishi Uxanga kelgan edi.

Davlat amaldorlarining aytishicha, koronavirus nafaqat odamlarning kasallanishi va o‘limiga olib keldi, balki millionlab ish o‘rinlari yo‘qotilishiga ham sabab bo‘ldi.